Знон канд нæ республикæйы нæ, фæлæ æнæхъæн бæстæйы дæр уыд «Работа России. Время возможностей», зæгъгæ, армукъа. Скодтой йæ Дзæуджы-
хъæуы, Алагиры, Елхоты адæмæн куыстдæттæн центртæ æмæ бирæфадатджын колледжты. Куыст чи агуры, уыцы адæмæн ма уыдис фадат, нырыккон уавæрты тынгдæр хъæугæ чи у, ахæм æндæр дæсныйадыл цыбыр рæстæгмæ ахуыртæ ацæуынæн дæр. Ахуыртæ та арæзт цæуынц национ проект «Кадры»-йы бындурыл.
Дзæуджыхъæуы адæмæн куыстдæттæн центры армукъа бабæрæг кодтой, РЦИ-Аланийы Хицауады Сæрдар Дзанайты Барис, РЦИ-Аланийы экономион рæзты министры фыццаг хæдивæг Олег Быкадоров, РЦИ-Аланийы ахуырад æмæ наукæйы министр Алыбегты Эллæ. Уæлдæр амынд центры сæргълæууæг Эллæ Авакова Хицауады уæнгтимæ æрзылд, нæ республикæйы амалхъомады куыст-
уæттæ æмæ мидхъуыддæгты оргæнты минæвæрттæ цы куысты бынæттæ рахас-
той адæмы размæ, уыцы «фæзтыл» æмæ уазджытæн радзырдта центры архайды тыххæй. Афæдз дыууæ хатты арæзт æрцæуы ацы мадзал, фыццаг вæййы регионалон, дыккаг та – федералон. Армукъа кæд регионалон уыд, уæддæр æндæр субъекттæ дæр сæ курдиæттæ æрбарвыстой. Тынг бирæ ваканситæ ис куророт «Мамысон»-ы, нæ республикæйы нæ фаг кæнынц пъæлицæйы кусджытæ. Дзанайты Барис биноныг алы куыстуаты минæвары дæр фæфарста, цавæр уавæртæ, мызды бæрцæй зæрдæ æвæрынц, куыст чи агуры, уыдонæн. Уый фæстæ журналисттæн йæ хъуыдытæ загъта.
– Абон райдыдта Æппæтуæрæсеон армукъайы регионалон хай, æмæ канд республикæйы цæрджытæ нæ, фæлæ нæ уазджытæ дæр зонгæ кодтой, куыст-
уæттæ цы бынæттæ дæттынц, уыдонимæ. Мæ хъус æрдардтон, тынг бирæ ногдзинæдтæ кæй фæзынд алы куыстуаты дæр, уымæ. Уый та ууыл дзурæг у, æмæ
республикæ рæзы, ногдæр хуызтæм ивд цæуынц æппæт дæсныйæдтæ дæр, нырыккон æхсæнады ахсджиагыл нымад чи цæуы, ахæмтæ. Нæ сæйраг хæс у æппæт уыцы дæсныйæдтæ куыстагурæгæн раттын. Æмæ нын ис фадат инвестицион æмæ раззагдæр кæй хонынц, ахæм проектты фæрцы сæххæст кæнын фарста. Фæлæ, кæддæриддæр тынг вазыгджын сты хуымæтæг дæсныйæдтæ. Сæрæнæй нæм рæзынц туризмы къабаз, промышленность, хъæууон хæдзарад æмæ дзы ног дæсныйæдтæ, æнæмæнг, хъæугæ сты. Центры фæрцы адæймагæн гæнæн ис йæ дæсныйад æндæрыл аивынæн æмæ йæ зонындзинæдтæ дæр фæфылдæр кæнынæн. Уый тыххæй та нæм кусынц алыхуызон бындурон ахуырадон уагдæттæ,– загъта Дзанайы-фырт.
Афтæ зæгъæн нæй, æмæ центрмæ тынг бирæ адæм цыдис, фæлæ чи æрбацыд, уыдон та уыдысты æрыгон адæймæгтæ æмæ сæ фылдæры фæндыд сæ дæсны-
йад æндæрæй раивын æмæ уый фæдыл ахуырадон уагдæттимæ бадзырд бафыссын.
Саутæты Тамилæ
