Зындгонд куыд у, афтæмæй Уæрæсейы Президент Владимир ПУТИНЫ уынаффæйæ Уæлахизы бæрæгбоны агъоммæ Хуссар Ирыстоны алкæцы хъæу æмæ скъолайæн дæр дихгонд æрцæудзæн фæйнæ 1 милуан сомы.
Владимир Путины уыцы уынаффæйы тыххæй фехъусын кæнгæйæ, Уæрæсейы Президенты Администрацийы Разамонæджы фыццаг хæдивæг Сергей КИРИЕНКО загъта: «Æрбахæццæ кæны нæ уарзондæр æмæ ахсджиагдæр бæрæгбæттæй иу – Уæлахизы бон. Ацы хатт мах бæрæг кæндзыстæм не Стыр Уæлахизы 80 азы. Уыцы табуйаг бæрæгбон зæрдыл даргæйæ æмæ, Хуссар Ирыстоны адæм Фыдыбæстæйы Стыр хæсты уæлахизмæ цы стыр бавæрæн бахастой, уымæн кад кæнгæйæ, Президент Путин йæ фестауæрцы фондæй республикæйы алкæцы хъæу æмæ скъолайæн дæр радих кодта фæйнæ 1 милуан сомы. Уыцы фæрæзты фæрцы базилæн уыдзæн хæстон мемориалтæм, музейты эскпозицитæм, бакæнæн уыдзæн æндæр хъæугæ куыстытæ. Фыдыбæстæйы Стыр хæсты азты Хуссар Ирыстоны цæрджытæ цы æгæрон хъæбатырдзинад æмæ Райгуырæн бæстæйыл æнувыддзинад равдыстой, уымæн рохгæнæн нæй».
Уæрæсейы Президенты уыцы уынаффæйыл Хуссар Ирыстоны цæрджытæ разæнгардæй сæмбæлдысты, арфæйаг ныхæстæ загътой Владимир Путины номыл. Дæлдæр мыхуыр кæнæм республикæйы ахуырадон кусæндæтты разамонджыты хъуыдытæ.
Арфæ кæнæм…
Нæ скъолайы ахуыргæнджытæ, скъоладзаутæ æмæ ныййарджыты комитеты номæй зæрдиаг бузныг зæгъын Уæрæсейы Президентæн йæ рæдау лæвары тыххæй! Уæрæсейаг финансон æххуыс республикæйы скъолаты дарддæры райрæзтæн зынгæ ахъаз кæй фæуыдзæн, уымæй мæ ныфс ис.
Æхсызгон мын у, уадзæн пункт «Дæллаг Зæрæмæг»-ы бындурон рацарæзтыл, «Промсвязьбанк»-ы хайад Цхинвалы байгом кæнын æмæ æндæр ахсджиаг
фарстатыл Уæрæсе æмæ Хуссар Ирыстоны минæвæрттæ кæй баныхас кодтой, уый дæр.
Не ’ппæт дæр æвдисæн стæм, дыууæ бæстæйы ’хсæн бастдзинæдтæ æнгомдæр кæй кæнынц, уымæн.
ГОБОЗТЫ Русудан,
Цхинвалы 1-æм астæуккаг скъолайы директор
Фыдыбæстæйыл алкæддæр – æнувыд
Уæлахизы боны агъоммæ хуссарирыстойнаг скъолатæ ахæм ахадгæ
æххуыс кæй райсдзысты, уый нæ разæнгард кæны ноджы бæрнондæр куыстмæ. Стыр бузныг!
Æхсызгонæй ма фæбæрæг кæндзынæн, республикæйы разамынды ’рдыгæй историон рæстдзинад бахъахъхъæныны, ахуырадон кусæндæттæн æххуысы фарстатæм лæмбынæг цæстдард кæй ис, уый дæр.
Хуссар Ирыстон алкæддæр сæрбæрзонд уыдис йæ хъайтар хъæбултæй.
Хистæр фæлтæрты хæстон намыс æмæ хъæбатырдзинадыл абон æнувыддзинад æвдисынц, сæрмагонд æфсæддон операцийы чи архайы, нæ уыцы лæппутæ. Æрмæст не скъолайы руагъдонтæй сæрмагонд æфсæддон операцийы тæлмы ис 52 адæймаджы. Владимир Путины загъдау: «Мах алы адæмыхæттыты минæвæрттæ стæм, фæлæ абон не ’ппæт дæр нæхи хонæм уырыссæгтæ».
Ольгæ МИХАЙЛИДИ,
Цхинвалы 2-æм астæуккаг
скъолайы директор
Фæрныгдæр фидæны
сæраппонд
Уæлахизы бæрæгбоны агъоммæ ахæм рæдау лæвар райсын бирæйы аргъ у. Владимир Путины уынаффæ ма иу аккаг бавæрæн у историон рæстдзинад бахъахъхъæныны хъуыддагмæ, Уæрæсе хистæр фæлтæрты удуæлдайдзинад æмæ хъæбатырдзинадæн стыр аргъ кæй кæны, зæрдæзæгъгæ фидæныл кæй кусы, уый æвдисæн.
Уæрæсе алкæддæр æрбалæууы нæ фарсмæ – уыцы æууæл нын стыр ныфсы хос у. Бузныг стæм Хуссар Ирыстоны разамындæй дæр, республикæйы тыхстаг фарстатæ алыг кæныныл Уæрæсейы Федерацийы минæвæрттимæ æнгом
æмгуыстад кæй кæны, уый тыххæй.
ГУЫЦМÆЗТЫ Иринæ,
гимназ «Альбион»-ы директор
Æрмæг бацæттæ кодта
СЛАНТЫ Аслан
