Уæрæсейы Хъахъхъæнынады министрады агитацион поезд «Иудзинад – номарæны. Хъару – сгуыхтдзинады!» Дзæуджыхъæуы æфсæнвæндаджы вагзалмæ æрбацыд.
Ацы æвæджиауы цæугæ музей банымайæн ис канд равдыстыл нæ, фæлæ
дуджы цаутыл балцыл. Аст тематикон вагоны фенæн ис Фыдыбæстæйы Стыр хæс-ты заманы сармадзантæ æмæ гаубицæтæ. Сæ фарсмæ æвæрд сты Уæрæсейы ныры æфсады хъаруйы æвдисæнтыл нымад нырыккон хæцæнгæрзтæ. Æппæтæй ахсджиагдæр та сты адæмы хъысмæттæ. Райгуырæн бæстæйы фидæны сæраппонд хæсты чи архайдта, экспонаттæ уыцы адæмы сгуыхтдзинæдтæ æвдисынц.
Æвдай фондз бонмæ агитацион поезд, 33 мин километрæй фылдæр ацæу-
гæйæ, Уæрæсейы 75 горæты æмæ 61 цæрæн бынаты бабæрæг кодта.
Поезды æрбацыды кадæн кæй сарæзтой, уыцы æмбырд амыдта 58-æм гвардион æфсады командæгæнæджы хæдивæджы хæстæ рæстæгмæ æххæстгæнæг, дæлбулкъон Александр Неофидов. Æмбырды раныхасгæнджыты æхсæн уыдысты акцийы разамонæг, контр-адмирал Александр Гринкевич, нæ республикæйы Фæсивæды хъуыддæгты комитеты сæрдар Джусойты Руслан, Ветеранты советы сæрдары хæдивæг Сихъоты Сослан æмæ æндæртæ.
Æппæтуæрæсеон æфсæддон-патриотон æхсæнадон змæлд «Æвзонг æфсад»-ы регионалон хайады хицау Вахтанг Мусульбес æмæ змæлды регионалон штабы уæнг Хуадонты Сæрмæт баххæст кодтой змæлды уæнгтæм фæсивæды райсыны фæтк.
Æмбырды архайджытæн куыд фехъусын кодтой, афтæмæй Дзæуджыхъæуы 3-æм астæуккаг скъолайы æвзонг æфсæддонты къордæн раттой Уæрæсейы Хъæбатыр, капитан Султан Хашагульговы ном.
Нæ уацхæссæг,
къамтæ систа
Баскаты Эльзæ
