Дыккаг Дунеон хæсты фашистон Герман æмæ йæ фарсхæцæг бæстæты ныхмæ Советон Цæдис æмæ Югославийæ уæлдай карз тохы бацыдысты грекъаг адæм дæр.
Грекъаг зæхх фашистон оккупанттæй ссæрибар кæныныл цы партизанты къордтæ тох кодтой, уыдоны ’хсæн уыдысты советон æфсæддонтæ дæр. Уыдонимæ сæхи хъæбатырæй равдыстой гермайнаг уацарæй раирвæзæг ирыстойнаг хæстонтæ. Грекъаг æфсады рæнхъыты чи хæцыд, уыцы ирон лæгты нымæц уыд æвдайæ фылдæр, æмæ сын грекъаг адæм сæ рухс ном кæддæриддæр æрымысынц сæ бæстæйы ссæрибаргæнджыты нæмттимæ.
Советон Цæдисы цæрæг грекъаг адæмæй Сырх Æфсады рæнхъыты чи уыд, уыцы хæстонтæ хъæбатырæй тох кодтой немыцаг фашистты ныхмæ.
Советон Цæдисы Хъайтары ном лæвæрд æрцыд æртынæй фылдæр грекъаг хæстонæн. Уыдон уыдысты: тæхæг Николай Гастелло, инæлар Лев Доватор, Советон Цæдисы дыууæ хатты Хъайтар Владимир Коккинаки æмæ иннæтæ. Ацы дæнцæг дзурæг у, Уæрæсе æмæ грекъаг адæмы хæлардзинадæн фидар бындур кæй ис, ууыл.
Ирыстоны цæрæг грекъаг адæм уыцы арфæйаг æгъдау хъахъхъæнынц цæсты гагуыйау. Мæнæ та ацы бонты дæр Уæлахизы 80 азы бæрæгбоны нæ респуб-
ликæйы грекъаг адæмы æхсæнад «Прометей», йæ сæрдар Юрий Асланидиимæ, сарæзтой рæсугъд, зæрдæагайгæ бæрæгбон сæ æхсæнады бæстыхайы.
Хуынд æм æрцыдысты: грекъаг æфсæддонты хи-уæттæ æмæ хæстæджытæ, грекъаг партизанты къордты уæвæг ирыстойнаг хæстонты хæстæджытæ, РЦИ-Аланийы цæрæг адæмты иугонд «Нæхи Ирыстон»-ы минæвæрттæ, сæ сæргъы Лагкуты Вячеслав, афтæмæй.
«Прометей»-ы бæстыхаймæ бацæуæны цур цы стыр зæрдылдарæн фæйнæг ис Фыдыбæстæйы Стыр хæст æмæ грекъаг зæхх ссæрибар кæныныл тохгæнæг ирыстойнаг æфсæддонты хуызистытимæ, уыцы ран æрбацæуджытæн бæрæгбоны арфæтæ ракодтой Лагкуты Вячеслав, РЦИ-Аланийы национ политикæ æмæ æддагон бастдзинæдты министр Бæгъиаты Алан, Ирыстоны пысылмæтты иугонды муфти Гуæцæлты Хадзымурат.
Æхсæнад «Прометей»-ы бæстыхайы сценæйæ бæрæгбон срæсугъд кодтой хихъæппæрисадон къордты архайджытæ. Се ’хсæн уыдысты, куыд хистæр кары артисттæ, афтæ хæрзæрыгон лæппутæ æмæ чызджытæ.
Сценæйæ хъуысыдыс-ты æмæ зæрдæтæ агайдтой Фыдыбæстæйы хæсты
цаутимæ баст мысинæгтæ, æмдзæвгæтæ, зарджытæ…
Баскаты Уырызмæг
