Куыддæр фæбонтæ кæна, афтæ 16 мин гектары фæзуатыл районы хæдзарæдтæ бавналдзысты рапс æфснайынмæ. Æмткæй райсгæйæ, Мæздæджы районы холладжы культуртæ ахсынц 1500 гектары.
Уалдзыгæнд мæнæу фесты тыд, тымбыл хъæдуры хуымтæ сæм ис 250, гæн – 1680, нартхор – 3350 гектары. Мæздæджы районы Хъæууон хæдзарады управленийы сæргълæууæг Æлхъацаты Зауыр куыд зæгъы, афтæмæй гæны килæйы аргъ у 30-40 сомы, æлхæнæг дæр æй ис. Сæйрагдæр æй æрвитынц Прохладный æмæ Ново-Павловскмæ, уырдыгæй та – фæсарæнтæм.
– Ацы аз 125 гектары бафтыд районы сæнæфсиры фæзуатыл, КФХ «Виноградарь Кавказа»-йы сæнæфсир ныридæгæн сагъд æрцыд 450 гектары. Фæстаг бæрæггæнæнтæм гæсгæ районы æфты стурвосы нымæцыл, 120 проценты бафтыд СПОК «НИВА»-йы хæдзарады фосыл.
Афæ-дзмæ дзы хъугæй æхсыр æрдуцынц æртæ мин литры. Уæвгæ та сæм стуртæ ис æхсæзсæдæ сæрæй уæлæмæ, уыдонæй 350 сты дуцгæ хъуццытæ. Сæ хъуыддæгтæ æвзæр нæ цæуынц КФХ «Закароев Шамиль»-ы хæдзарады дæр. Æртæсæдæ æхсæз сæрæй дыууæсæдæ фондз сты дуцгæ хъуццытæ. Афтæмæй, стурты нымæц нæ районы фæфылдæр 106 проценты, – районы хæдзарæдты архайдимæ нæ базонгæ кодта Хъæууон хæдзарады управленийы сæргълæууæг.
Фосдарынады рæзт ахадгæдæр уаид, Мæздæджы районы цæрджытæй уыцы куыст кæнынмæ чи арæхсы æмæ йæм чи тырны, уыдонæн гранттæ лæвæрд куы æрцæуид, уæд. Хъыгагæн, ныр æртæ азы районы иу фосдарæгæн дæр нæ бантыст грант райсын. Фæлæ сæ къухтæ не ‘руагътой. Æнхъæлмæ кæсынц, уавæр кæд фæхуыздæр уыдзæн, уымæ.
Фаронимæ абаргæйæ, маргъдарæн хæдзарæдты æфтауæг кæрчыты нымæц фæфылдæр 150 проценты, æмæ, фæстаг бæрæггæнæнтæм гæсгæ, ныр районы ис 64 639 мин карчы. Уый фадат дæтты нæ республикæйы цæрджыты бынæттон хæлцы продукттæй асламдæр аргъæй æфсадынæн.
ХУЫБИАТЫ Ларисæ,
къам систа
БÆРÆЗГАТЫ Валери
