Политикон парти «Иугонд Уæрæсе» æмæ бæстæйы Рухсады министрад сарæзтой ахуыргæнæндæттæ бындуронæй цалцæг кæныны æмæ сæ аразыны фæдыл æппæтуæрæсеон æмбырд.
«Иугонд Уæрæсе» æмæ амынд ведомствæ кæй æххæст кæнынц, ацы аз уыцы президентон программæйы архайы 1277 скъолайы, 142 рæвдауæндоны æмæ 132 колледжы. Рухсады министр Сергей Кравцовимæ, партион проект «Ног скъола»-мæ цæстдарæг Аленæ Аршинова æмæ регионты минæвæрттимæ хъуыддаджы фембæлды рæстæг партийы Генералон советы секретарь Владимир Якушев куыд фехъусын кодта, афтæмæй 33 объекты фæдыл бадзырдтæ фидаргонд не ’рцыдысты.
– Иуæй-иу объектты фæдыл бадзырдтæ рæхджы фидаргонд æрцæудзысты, иуæй-иу объектты документтæ æрбафтыдысты æрæгмæ, иннæ объектты фæдыл конкурсон фæтк та сидгæ дæр нæма ракодтой, – загъта Владимир Якушев.
Ног скъолатæ æмæ рæвдауæндæтты арæзтадыл дзургæйæ, хицауы бынатахсæг адæймаг куыд загъта, афтæмæй пъланмæ хаст объектты æмбисæн ныридæгæн бадзырдтæ цæттæ сты.
– Æдæппæт æхсай авд скъолайы æмæ фæндзай авд рæвдауæндоны саразынмæ хъавæм. Ныронг иуæндæс регионы скъолатæ, æхсæз регионы та рæвдауæндæттæ саразыны фæдыл конкурстæ нæма расидтысты. Арæзтадон куыстыты æмгъуыд цалцæггæнæн куыстыты æмгъуыды хуызæн цыбыргонд нæу. Объектты фылдæр хай хъуамæ байгом уа 2026-2027 азты, фæлæ чысыл къуыхцыты аххосæй дæр иуæй-иу куыстытæ афоныл æххæстгонд не ’рцæуынц, – ныхас кæнгæйæ, загъта Владимир Якушев.
Цалдæр объекты фæдыл тæссагдзинæдтæ бацамонгæйæ, Сергей Кравцов куыд загъта, афтæмæй Краснодар æмæ Стъараполы крайтæ, Томены, Тверы, Ульяновскы, Курскы, Тулæйы, Липецкы, Омскы, Калугæ æмæ Тамбовы облæсттæ, Донецкы Адæмон Республикæ, Карели æмæ Чукоткæйы автономон зылд куыстытæ æххæст кæныны фæдыл ног бадзырдтæ нæма сфидар кодтой.
Владимир Якушев «Иугонд Уæрæсе»-йæн бахæс кодта ахуырады объекттæ бындуронæй цалцæг кæныны æмæ сæ аразыны куыстытæм цæст дарыны хъуыддаджы регионалон æмæ муниципалон хицæуттæн æххуыс кæнын. Партийы Генералон советы секретарь уæлдай фылдæр æргом аздæхта ныййарджыты архайдмæ амынд хъуыддаджы.
– Бæстыхайы бакастыл, йæ аивдзинадыл райдианы проектты ныхас кæй цæуы, уый хынцгæйæ, ныййарджытæ дæр ацы хъуыддаджы хъуамæ архайой, бындурон цалцæггæнæн куыстыты куыд архайынц, афтæ. Ахуыры аз кæронмæ фæхæццæ кæны. Нæ хæс у сæрды биноныг бакусын, фыццæгæм сентябрмæ объекттæ куыд байгом уой, афтæ, – загъта партийы генералон секретарь.
Æмбырды архайæг, партион проект «Ног скъола»-мæ регионалон цæстдарæг, нæ республикæйы ахуырады министры хæдивæг Дзанайты Маркы ныхасмæ гæсгæ, нæ республикæ ахуыргæнæндæттæ бындуронæй цалцæг кæныны фæдыл программæ биноныг æххæст кæны.
– Рæвдауæндæттæ æмæ астæуккаг профессион ахуыргæнæндæттæ
программæмæ бахастам фыццаг хатт. Аразджытæ цалцæг кæнын райдыдтой æртæ профессион ахуыргæнæндоны æмæ дыууæ рæвдауæндоны. Дыууæазон æмгъуыдмæ ссæдз скъолайы цалцæггæнæн куыстытæ дарддæр цæуынц. Мартъийы кæрон, ахуырдзаутæн каникултæ куы уыд, уæд иумæйаг ахуыргæнæндæттæ цалцæг кæнын райдыдтам, – загъта Дзанайы-фырт.
Уæ зæрдыл уын лæууын кæнæм: 2021 аз «Иугонд Уæрæсе»-йы съезды ныхас кæнгæйæ, УФ-йы Президент Владимир Путин бахаста скъолаты бындурон цалцæгкæнынады программæ баххæст кæныны фæндон (парти амынд программæ æххæст кæны Рухсады министрадимæ). Ахуыргæнæндæттæ бындуронæй сцалцæг кæныны, стæй ног скъолатæ æмæ рæвдауæндæттæ саразыны фæдыл программæ баххæст кæнынæн федералон бюджетæй фæрæзтæ цæмæй радих кæной, парти уымæн фадæттæ сарæзта.
Санаты Альбинæ
