Æрыдоны районы Мичурины хъæуы астæуккаг скъолайы англисаг æвзаджы ахуыргæнæг Калоты Аслан ссис конкурс «РЦИ-Аланийы афæдзы педагог – 2025»-ы уæлахиздзау.
Амынд скъолайы анг-лисаг æвзаджы иунæг ахуыргæнæг Калойы-фырт хуымæтæг урокæй саразы балц. Урокы рæстæг англисаг æвзаджы кусæнуатæй рауайы кæнгæ англисаг кафе. Официант стъолыл æрæвæры хойраджы номхыгъд. Англисаг æвзагзонæг ахуырдзаутæ сæхицæн алыхуызон хойраг бафæдзæхсынц.
Фæстæдæр 9-æм къласы ахуырдзаутæн уыд «Дунеон конференци Кремлы», чысыл раздæр та ацы скъоладзаутæ сарæзтой «алыхуызон бæстæтæй зындгонд адæймæгты фембæлд». Алыхуызон сценкæты фæрцы Калойы-фырт скъоладзауты ахуыр кæны кæрæдзиимæ англисагау дзурыныл.
Аслан каст фæци Дзæуджыхъæуы 47-æм скъола. Фæстæдæр
ахуыр кæнынмæ бацыд Мæскуыйы уæлдæр техникон ахуыргæнæндæттæй иумæ, фæлæ ам бирæ рæстæг нæ бафæстиат. Æрбаздæхт райгуырæн зæхмæ æмæ ахуыр кæнынмæ бацыд Цæгат Ирыстоны паддзахадон университеты психологон-педагогон факультетмæ. Асланы фæндыд тæлмацгæнæг суæвын, фæлæ куыдфæстæмæ йе ’ргом скъоладзаутимæ куыстмæ аздæхта. Калойы-фырт скъолайы кæд æрмæст аст мæйы кусы, уæддæр ныронг ссис ахуыргæнджыты конкурсы номинаци «Педагогон дебют»-ы уæлахиз-дзау.
Цыппар фæсарæйнаг æвзаджы чи зоны, æмдзæвгæтæ чи фыссы æмæ Интернеты хи канал чи дары, Мичурины хъæуы скъолайы коллектив уыцы æрыгон ахуыргæнæг Калоты Асланæн кад кæны. Скъоладзаутæ дæсны ахуыргæнæджы фæрцы англисаг æвзаг бауарзтой. «Фæлтæрдджын ахуыргæнджыты хъахъхъæнгæйæ, арха-йæм курдиатджын æрыгон зондамонджыты скъолатæм æрбахоныныл», – зæгъы ахуырады фарстаты фæдыл Æрыдоны районы администрацийы сæргълæууæджы хæдивæг Багаты Ибрагим.
Æмткæй райсгæйæ, ацы аз районы ахуыргæнджытæ конкурс «Афæдзы педагог»-ы фæуæлахиз сты цыппар номинацийы, æхсæз адæймаджы систы конкурсы призертæ, дыу-уадæс та – лауреаттæ.
Дзæдзойты Фатимæ
