Алы азты, алы рæстæджыты дæр, Ирыстон йæ сæр бæрзæндты кæмæй хаста, йæ номæй йæ райгуырæн зæххæн кад чи скодта, ахæм адæймæгтæй мæгуыр никуы уыд. Уыдонæй у зындгонд ирон кафæг, хореограф æмæ балетмейстер, «Хъаматимæ кафт» чи сæвæрдта æмæ йæ æппæты фыццаг чи акафыд, уыцы адæймаг – Битарты Зауырбег дæр. Хъысмæты уынаффæйæ йæ цард, хъыгагæн, дæргъвæтин нæ разынд, аскъуыд æрдæгыл, йæ тæккæ лæджы кары куыд бацыд æмæ йæ бирæ фæндæттæ æмæ нысантæ се ‘ппæт къухы куы нæма бафтыдысты, уæд. Фæлæ йын уый хыгъд хъысмæт балæвар кодта диссаджы курдиат. Æмæ уыцы курдиатимæ, нырыккон фæлтæры ма базонгæ кæнын, Зауырбеджы ном рохуаты ныууадзын – ахæм бар ирон адæмæн нæй.
Битарты Зауырбег уыд зындгонд ирон кафæг, педагог, хореограф, балетмейстер. Йæ ном йæ рæстæджы айхъуыст кæддæры стыр Советон Цæдисы бирæ республикæтыл. Адæмон кæфтыты ансамбльтæн программæ сæвæрыны тыххæй-иу æй фæхуыдтой Хуссар Ирыстонмæ, Грознамæ, Элистамæ, Челябинскмæ, Астæуккаг Азимæ, нæ бæстæйы бирæ æндæр горæттæм… Зындгонд балетмейстер, ССР Цæдисы адæмон артист Игорь Моисеев разамонæг кæмæн уыд, уыцы хъуыстгонд ансамблы йе сфæлдыстадон фæндаг кæй райдыдта, уый дæр фаг у, Битарты Зауырбег цы стыр курдиаты хицау уыд, уый бамбарынæн.
«Хъаматимæ кафт»-æй уæлдай Битарты Зауырбег, ансамбль «Терчы» кусгæйæ, сæвæрдта, аивадуарзджыты зæрдæмæ тынг чи фæцыд æмæ абон дæр ма ансамбль «Алан»-ы репертуары чи ис, уыцы кæфтытæ – «Къахфындзтыл кафт», «Дыууæуæладзыгон кафт», «Чызджыты кафт», «Ирон вальс», «Акушинаг кафт» æмæ бирæ æндæртæ.
«Алан»-æн бацæттæ кодта, ансамбль кæмæй сфидыдта æмæ йæ астæуккаг цæджыдз чи ссис, ирон дæсныдæр кафджыты ахæм къорд, се ‘хсæн: Къодзаты Зелимхан, Калоты Земфирæ, Плиты Нодар, Булацаты Таймураз, Карсанаты Мæхæмæт, Зассеты Валентинæ, Джыккайты Тотрадз, Æбиты Виктор… Ахæм ахуыргæнинæгты бацæттæ кæн, уый йæхæдæг кæуылты у!
Куыд иннæтæй, афтæ Къодзаты Зелимханæй абон дæр рох нæу йæ курдиатджын æмæ куырыхон ахуыргæнæг. Йæ ном арф æвæрд у йæ зæрдæйы, æмæ йæ сæнусон кæныны фæнд Зелимханмæ рагæй уыд. Афтæмæй йæм æрцыд хорз хъуыды – Битарты Зауырбеджы номыл дунеон фестиваль-конкурс саразын. Йæ фарсмæ балæууыдысты, йæ фæнд ахсджиагыл чи банымадта, ахæм хъæппæрисджын адæймæгтæ, æмæ хъуыддаг сырæзыд.
Фестиваль арæзт æрцæудзæн ацы аз 17 июны. Цæмæй дзы бацархайой, уый тыххæй нæ республикæмæ æрцæудзысты уазджытæ Цæгат Кавказы 12 регионæй – Абхазæй, Хуссар
Ирыстонæй, Кæсæг-Балхъарæй, Дагестанæй, æндæр рæттæй. Сæ минæвæрттæ, национ кафты ансамбльты архайджытæ, равдисдзысты хъаматимæ кафты сæ дæсныдзинад. Аргъгæнæг сын уыдзæн сæрмагонд жюри, йæ сæргъы – Къодзаты Зелимхан, афтæмæй. Фыццаг, дыккаг æмæ æртыккаг бынат бацахсджытæн балæвар кæндзысты фестивалы сæрмагонд лæвæрттæ æмæ æхцайы премитæ. Битарты Зауырбеджы номыл фестиваль-конкурс арæзт цæуы фыццаг хатт. Фæлæ йæ саразджытæ фæнд кæнынц нырæй фæстæмæ йæ алы аз дæр аразын, цæмæй хъаматимæ кафты дæсныдæртæ дзы сæ аивад æвдисой æмæ кæрæдзийы сæ фæлтæрддзинадимæ зонгæ кæной.
Хъуыддаг цæмæй сырæза, уымæн зæрдиаг æххуыс бакодта Битарты Вячеслав, æмæ йын йæ саразджытæ зæрдæбынæй арфæ кæнынц.
ДЕДЕГКАТЫ Зæлинæ
