Æрыдоны районæй Нартыхъæуы скъолайы ныр дыккаг аз кусы агрономон ахуырады кълас. Уым сывæллæттæ зæххы куыст ахуыр кæнынц канд чингуытæ æмæ æндæр методикон амынддзинæдтæм гæсгæ нæ, фæлæ хуымты архайгæйæ дæр – белтимæ, рувæнтимæ, æндæр хъæугæ кусæнгæрзтимæ, сæхæдæг бафснайынц сæ фыццаг фæлтæрæнты тыллæг дæр.
Ахуыргæнджытæ сын бæлвырд амонынц алцыдæр, мыггæгтæ равзарынæй райдай æмæ, цы ‘рзайын кæнай, уыдæттæ афоныл æмæ иууылдæр бафснайыны онг. Зæгъæм, ныртæккæ сæ сæйраг хæс у хуымтæ хæмпæлгæрдæгæй ссыгъдæг кæнын, стæй, дон мæры фылдæр куыд баззайа, ууыл бацархайын. Æрыгон зæхкуыстгæнджытæ сæ хуымтæм донæфсадæн системæ дæр сæхæдæг æрæмбырд кодтой æмæ бафтыдтой куысты.
Ацы уалдзæг скъоладзаутæ ныссагътой алыхуызон культурæтæ – настæ, картоф, нартхор, цъæх хъацæнтæ, æдæппæт зайæгойты фынддæс хуызы бæрц. Иудадзыг сæм зилынц агрономон домæнтæм гæсгæ – дон сыл кæнынц, рувынц сæ, сæ цæст дарынц æвзарты уавæрмæ.
Сæ хъомылгæнджытæ куыд зæгъынц, афтæмæй сын уæлдай æхсызгон у, фæсивæдæн сæ фылдæр сæ цард зæххы куыстимæ сбæттыныл тынгæй-тынгдæр кæй хъуыды кæнынц, се ’взонг зондахасты фылдæрæй фылдæр бынат ахсын кæй байдыдта, уый. Æвæццæгæн, гъе уый мидæг ис йæ сæйраг ахадындзинад агрономон къласы фæзынд скъолайы. Чи зоны, абоны скъоладзаутæ се ’ппæт наукæйы уыцы къабазимæ не сбæтдзысты сæ дарддæры цард, фæлæ сын, кæмфæнды дæр æххуыс кæй кæндзæн, уый та дызæрдыггаг нæу.
«Ир-информ»
