Цыколайы дыккæгæм скъолайы фæзуаты хъазуатонæй аразынц гом физкультурон-хидзæбæхгæнæн комплекс.
Проект царды уагъд цæуы федералон проект «Хъæуты нырыккон фæлгонц»-ы Республикæ Цæгат Ирыстон-Аланийы паддзахадон программæ «Хъæуты фæзуæтты комплексон рæзт»-ы фæлгæты. Паддзахадон контракты заказчик у республикæйы Хъæууон хæдзарады министрады капиталон арæзтады управлени. Йæ сметæйы аргъ – 16 290 000 сомы.
Скъолайы кæрты уыдзæн æрдзон æмбæрзт нырыккон футболæй хъазæн фæз; нырыккон стандарттæм гæсгæ – баскетболæй хъазæн фæзуат; воркаут – физикон æгъдауæй хи фæфидар кæныны зонæ.
Проекты амынд ис йæ алыварс фæзуаты цъæхфæлыст, нырыккон цырæгътæ æдасдзинады тыххæй, фæллад уадзынæн фæхсбадæнтимæ зонæ.
Ног бæстыхай суыдзæн дыккæгæм скъолайы ахуырдзаутæ æмæ хæстæгдæр микрорайонты фæсивæды уарзон фæлладуадзæн æмæ рæстæг пайдаимæ æрвитæн бынат. Ам æмбæлдзæн аразын командæтæ æмæ иугай спорты хуызтæй ерыстæ.
Нырыккон спортивон инфраструктурæ цæрæнбынæттæм æввахс саразын у хъæуты скъоладзауты æнæниз æмæ разæнгард фæлтæр схъомыл кæнынмæ, царды уаг фæхуыздæр кæнынмæ егъау къахдзæф.
ТЕМЫРТЫ Алинæ,
æхсæнадон уацхæссæг
