РЦИ-Аланийы Сæргълæууæг Сергей Меняйло Парламенты æмбырды раз, нæ регионы дарддæры æнæкъуылымпы размæцыдæн цы нысантæ ис, уыдоныл дзургæйæ, сæрмагондæй æрлæууыд социалон фарстатыл. Ахсджиагыл банымадта Цæгат Ирыстоны бынæттон цæрджыты картæ рауадзын. Нæ
республикæйы чи цæры, социалон уæлæмхасæн лæггæдтæ кæмæн æмбæлы, уыдон дзы пайда кæндзысты – пенсиисджытæ, инвалидтæ, хæсты архайджытæ æмæ æндæртæ.
Сæргълæууæджы хъуыдымæ гæсгæ, афтæмæй адæмæн æнцондæр
уыдзæн паддзахадон æмæ республикон лæггæдтæ исын: лæвар цæуыны бар æхсæнадон транспортыл, музейтæм, театртæм, концерттæм æмæ афтæ дарддæр. Уымæ гæсгæ бафæдзæхста Фæллой æмæ социалон рæзты министрадæн, æнтыстджынæй ахæм картæтæй кæм пайда кæнынц, уыцы регионты фæлтæрддзинадæй спайда кæнынæн фарстамæ лæмбынæг æркæсын. Сæйрагдæрыл банымадта, цæмæй, картæйæ чи пайда кæна, уыдонæн уа æнцонархайд æмæ сын пайда хæсса.
РЦИ-Аланийы Сæргълæууæджы уынаффæтæ куыд æххæстгонд цæуынц, уый тыххæй журналисттимæ фембæлды рæстæг радзырдта РЦИ-Аланийы фæллой æмæ социалон рæзты министры хæдивæг Маматы Анджелæ. Ныхас цыдис сæрмагонд æфсæддон операцийы архайджытæ æмæ сæ бинонтæн социалон æххуысы, гранттæй æххуысы æмæ социалон картæйы куысты тыххæй.
– Æвæстиатæй бавнæлдтам нæ размæ æвæрд хæстæ æххæст кæнынмæ. Сæрмагонд æфсæддон операцийы архайджытæ æмæ сæ бинонтæн республикæйы ис æртынæй фылдæр алыхуызон реабилитацион æмæ социалон лæггæдтæ, æхцайæ æххуыс, сæ сывæллæттæн ахуырадон кусæндæтты ис уæлæмхасæн лæггæдтæ. Фыццаградон æххуыс уыцы бинонты кæстæртæ райсынц. Зæгъæм, балцæгтæ сын вæййы, куыд нæхи, афтæ æндæр регионты фæлладуадзæн бынæттæм. 8 августы та сывæллæтты иу къорд араст уыдзæн Сау денджызы былмæ, – загъта министры хæдивæг.
– Социалон картæйы тыххæй Сæргълæууæ-джы хъæппæрисимæ разы стæм. Хъæугæ æмæ хорз хъуыддаг у. Лæмбынæг ахуыр кæнæм Мæскуы æмæ Мæскуыйы облæсты, Ленинграды облæст æмæ Сахалины, стæй Ямалы фæлтæрддзинад.
Ныридæгæн нæм ис, нæхи регионы хуыздæр чи сфидаудзæн, ахæм хъуыдытæ. Социалон картæ «Мир»-æй пайда кæнгæйæ, уырдæм бахæсдзыстæм компенсацион фиддонтæ, субсидитæ, материалон æххуыс, стæй, уæлæмхасæн лæггæдтæ кæмæн æмбæлы, уыцы граждæнтæн транспортыл лæвар цæуыны бар.
Нæ проекттыл кусæм хицауиуæггæнæг оргæнтимæ. Алы хъуыддагæн дæр йæ райдайæн æнцон нæ вæййы, фæлæ архайæм, æххуыс нын у фиддонты национ системæ «Мир».
Картæйæ пайда чи кæндзæн, уыцы номхыгъды уыдзысты, уæлæмхасæн лæггæдтæ кæмæн æмбæлы, уыцы граждæнтæ. Стыр базарадон организациты дæр сæ пайдагæнæн уыдзæнис.
Нæ министрад æнæсцухæй кусы, цæмæй æххуысхъуаг адæмæн, уыимæ – сæрмагонд æфсæддон операцийы архайджытæн, фадат уа хи хæдзарад саразын æмæ дзы пайда исынæн. 2024 азы ахæм социалон контракттæ æфсæддонтимæ 20 фылдæр бафыстам, ацы аз та – æхсæз социалон контракты.
Ныфс нæ ис, республикæйы Сæргълæууæджы амынддзинæдтæ иууылдæр æххæстгонд кæй æрцæудзысты, – загъта Маматы Анджелæ.
Гугкаты Жаннæ
