Алыхуызон карз æмæ тæссаг низтæ рагагъоммæ къæпхæнтыл рабæрæг кæныны хъуыддаджы ахадгæ у цæугæ медицинон комплексты архайд. Азы райдайæнæй нырмæ сæрмагонд пъланы бындурыл уыцы комплексты специалисттæ бабæрæг кодтой республикæйы районты бирæ хъæутæ, уыимæ, дæрддзæф цæрæн бынæттæ дæр.
Цæгат Ирыстоны Æнæниздзинад хъахъхъæнынады министрады бæрæггæнæнтæм гæсгæ, азы райдайæнæй нырмæ медицинон комплекстæ районтæм абалц кодтой 800 хаттæй фылдæр. Специалисттæ хъæууон цæрæн бынæтты цы медицинон раиртæстытæ сарæзтой, уыдоны архайæг уыдысты 33 мин адæймагæй фылдæр.
Министрады минæвар куыд радзырдта, афтæмæй цæугæ медицинон комплексы фæрцы æххæстгонд æрцæуынц маммографийы, флюорографийы, ЭКГ æмæ æндæр раиртæстытæ. Уыимæ, комплексы цы медицинон бригад вæййы, уым кусынц терапевт, офтальмолог, оториноларинголог æмæ æндæр специалисттæ.
Комплексты фæрцы диспансеризацийы мадзæлттæ æмæ æндæр медицинон æркаст кæмæн сарæзтой, уыцы адæмæн дохтыртæ раттынц бæлвырд амынддзинæдтæ, дарддæр сæ цавæр специалистты бæстондæр консультаци бахъæудзæн, уый фæдыл.
Медицинон комплекстæ æлхæд æрцыдысты фыццаградон национ проект «Æнæниздзинад»-ы уагæвæрды бындурыл, ныр та сæ куыст арæзт цæуы ног национ проект «Дæргъвæтин æмæ зæрдæзæгъгæ цард»-ы фæткыл.
Дмитрий Астахов
