Евгений Вахтанговы номыл мæскуыйаг академион театры разамынды уынаффæйæ æхцайы æххуыс дихгонд æрцыд Тугъанты Махарбеджы номыл Аивадон музейæн.
Уый тыххæй «Рæстдзинад»-æн фехъусын кодтой РЦИ-Аланийы Культурæйы министрады пресс-службæйы.
Зындгонд куыд у, афтæмæй июлы райдайæны Дзæуджыхъæуы йæ куыст кодта дыккаг æппæтуæрæсеон театралон фестиваль «Вахтангов. Фыдыуæзæгмæ фæндагыл». Аивады уыцы бæрæгбоны фæстæ Евгений Вахтанговы номыл мæскуыйаг театры директор Кирилл Крок уыд Тугъанты Махарбеджы номыл Аивадон музейы уазæг. Уый хорз аргъ скодта, музейы коллекцийы цы аивадон куыстытæ ис, экспозицитæ куыд арæзт сты, уыдæттæн.
Фæлæ мæскуыйаг уазæг, аивадыл æнувыд чи у, хуымæтæг ахæм адæймаг нæ разынд. Уый йæ профессион цæстæнгасæй бафиппайдта лыстæг аиппытæ дæр – музеймæ бахизæнтæ базилинаг сты, кæцыдæр бæстыхæйттæ уæлæнгай цалцæг домынц… Экскурсийы фæстæ Кирилл Крок фембæлд музейы директор Тебиаты Галинæимæ æмæ йын æххуысæй зæрдæ бавæрдта. Афтæмæй сæрмагонд бадзырды бындурыл мæскуыйаг театр хæрзаудæн æххуысы хуызы дзæуджыхъæуккаг музейæн радих кодта 200 мин сомы. Уыцы фæрæзтæй барæсугъд кæндзысты цалдæр музейон фæзуаты.
Аивадон музейы кусджытæ разыйæ баззадысты ахæм рæдау лæварæй. «Мах æгæрон бузныг стæм «вахтанговонтæй»! Культурæйы кæцыфæнды кусæндонæн дæр ахæм æххуыс ахадгæ у. Нæ зæрдæ дарæм, музейтæ æмæ культурæйы иннæ кусæндæттæн ахæм æххуысгæнджытæ фылдæр кæй фæзындзæн, ууыл», – загъд ис, музейы коллективы номæй Кирилл Крокмæ цы арфæйы фыстæг арвыстой, уым.
Дмитрий АСТАХОВ
