Ацы бонты Цæгат Ирыстоны уазæг уыд, медиа фæрæзтæ æмæ журналистикæйы къабазы æппæтуæрæсеон преми «ШУМ»-ы номинациты чи архайдта, уыцы блогерты къорд. Блог-туры архайджытимæ фембæлд РЦИ-Аланийы Сæргълæууæг Сергей МЕНЯЙЛО.
Цалдæр боны дæргъы республикæйы уазджытæ зонгæ кодтой ирон адæмы истори æмæ культурæимæ, фыдæлтыккон æгъ-
дæуттæ æмæ цымыдисагдæр зæрдылдарæн бынæттимæ… Сæ балцы фæстиуæгæн блогертæ бацæттæ кæндзысты Цæгат Ирыстоны тыххæй алыхуызон бæстæзонæн æрмæджытæ, равдисдзысты регионы туризмы хъомыс (ам зæгъын, æвæццæгæн, æмбæлы, блог-туры архайджытæн се ’рмæджытæ социалон хызæгты кæй кæсынц 6,5 милуан адæймагæй фылдæр).
Сергей Меняйлойæн зæрдæбын ныхас бацайдагъ медиа фæрæзты минæвæртты ног фæлтæримæ – фембæлды бынат уыд фарстытæ æмæ дзуаппытæн, фиппаинæгтæ æмæ фæндæттæн, арфæтæ æмæ æндæр зæгъинæгтæн…
— Ирыстон уазæгуарзаг республикæ у, ис ын рагон истори æмæ хъæздыг культурæ. Фæлæ регионы сæйрагдæр хъæздыгдзинад йæ адæм сты. Уыдоны хъæппæрисджын фæллойæ размæцыды фæндагыл лæуд у Цæгат Ирыстон. Дызæрдыг нæ кæнын, уæ балцæй райгондæй кæй баззайдзыстут, ууыл. Уæ блог-туры сæйрагдæр нысан у регионты туристон авналæнтæ æмæ цымыдисагдæр бынæттæ равдисын, æмæ уыцы хъуыддаджы республикæмæ ис, цы равдиса, цавæр объекттæ æмæ лæггæдтæй барухс кæна туристтæ æмæ иннæ фæлладуадзæг адæмы зæрдæтæ. Туризмы райрæзтæн Ирыстоны ис хорз фадæттæ, къабаз экономикон æгъдауæй дæр фидардæр кæны, – йæ раныхасы бафиппайдта регионы разамонæг.
Нæ республикæйæ уæлдай, блог-туры архайджыты программæйы сты Мæскуы æмæ Челябинскы облæсттæ.
Медиа фæрæзтæ æмæ журналистикæйы къабазы æппæтуæрæсеон преми «ШУМ» нысангонд æрцыд Фæсивæды хъуыддæгты фæдыл федералон агентад æмæ Калининграды облæсты Хицауады иумæйаг уынаффæйæ. Уыимæ, преми лæвæрд цæуы федералон проект «Уæрæсе – уæрæх фадæтты бæстæ»-йы уагæвæрды бындурыл. Блогерты балцæн фадæттæ сарæзта РЦИ-Аланийы Хицауад.
РЦИ-Аланийы Сæргълæууæг æмæ
Хицауады пресс-службё
