1 июлæй Хъалонты службæ ноджы карздæрæй кæсын райдыдта иу картæйæ иннæмæ æхца æрвитыны хъуыддагмæ.
Нырæй фæстæмæ Хъалонты службæйæн ис бар банктæй æрцагурын хъусынгæнинаг, адæймаг йæ картæйæ æхца кæмæ æрвиты, кæнæ йын йæхимæ чи цы æхца æрвиты, уый тыххæй. Раздæр афтæ карзæй каст цыд æрмæстдæр бизнесы кусджытæ æмæ хи амалхъомты банчы картæтæм. Ныр та, Хъалонты федералон службæйы домæнмæ гæсгæ, банктæ хъуамæ бавдисой æппæт финансон операциты тыххæй, хыгъдтæ гом кæнын æмæ сæ æхгæныны тыххæй хъусынгæнинæгтæ. Ахæм ног уагæвæрдтæ фидаргонд æрцыдысты УФ-йы Хъалонты кодексы 86 статьяйы срастгæнинæгты.
Уымæ гæсгæ эксперттæ фæдзæхсынц:
– машинæ куы æлхæнат, кæнæ балцæг фæллад уадзынæн, кæнæ æндæр исты зынаргъ дзаума, уæд ын картæйæ фидæн нæй, уымæн æмæ, бирæ æхца цы картæйæ æрвыст цæуы, уымæ банк тынг лæмбынæг кæсы æмæ уын, гæнæн ис, уæ хыгъд сæхгæна;
– куыд хи амалхъомгæнæг, адæймаг регистрацигонд куы нæ уа, уæд, фатер цæрынæн дæтгæйæ, товартæ уæй кæнгæйæ кæнæ лæггæдтæ аразгæйæ, цы æхца исы, уый иудадзыгдæр йæ картæмæ куы цæуа, уæд уый дæр у тæссаг, уымæн æмæ, гæнæн ис, æмæ уыцы хъуыддагмæ Хъалонты службæ акæса æмбæхст æфтиæгты цæстæй;
– официалон æгъдауæй фыст чи нæ цæуы, уыцы мыздæн картæмæ æрвитæн нæй, науæд уый уыдзæн æфсон картæйы хыгъд сбæрæг кæнынæн æмæ адæймаджы фæивар кæнынæн.
Эксперттæ амонынц:
зæгъæм, скъолаты ныййарджыты комитеттæн æхца æмбырд кæнгæйæ, кæнæ æндæр ахæм коллективон домæнтæ æххæст кæнгæйæ, сæ бон у пайда кæнын, алы банкæн дæр чи ис, уыцы официалон фæрæз – «Сбор»-æй. Афтæмæй хъуыддаг арæзт цæудзæн æргомæй æмæ закъоны бындурыл.
Æмæ сæйраг:
хионæн, зонгæйæн, бинонтæй искæмæн – кæмæнфæндыдæр адæймаг йæ картæйæ æхца куы æрвита, картæйæ истæмæн куы фида, уæд уым тæссагæй ницы ис. Тæссаг уыдзæн картæйæ бирæ æхца æмæ иудадзыгдæр æрвитын. Уыимæ, уыцы æрвыстытæ
æмбæрстгонд куы нæ уой, уæд ахæм цаутæм хъалонты оргæнтæ уыдзысты тынг къæрцхъус.
