ЦИПУ-йы историон факультеты студенттæ архайынц Хъырымы республикæйы археологон балцы. Уым кусынц археологийы антикон цыртдзæвæн Кыз-Аулы некрополы къахæнты.
Иртасæн куыстыты архайынц 1-3 курсыты студенттæ Еналдыты Тимур, Дмитрий Андрейков Сотаты Вероникæ, Легойты Руслан, Цæхойты Дзерассæ, Мецъаты Сæрмæт.
Уæрæсейаг историйы кафедрæйы доцент, историон наукæты кандидат Мамиаты Михалы разамындæй наукон-студентон лаборатори «Бынтæ»-йы архайджытæ Уæрæсейаг наукæты академийы Археологийы институты кусджытимæ кæнынц наукон-агурæн куыст Боспораг паддзахады (бындур ын сæвæрдтой колонисттæ нæ дуджы размæ VI-æм æнусы), археологон цыртдзæвæнтæ иртасгæйæ.
Цыртдзæвæн Кыз-Аул ис поселок Яковенкойы фарсмæ донбылгæрон. Ис дзы бирæ монументалон дурын зæппæдзтæ. Некрополь иртасгæйæ, æргомгонд æрцæудзысты византийаг-алайнаг бастдзинæдты ног цæвиттонтæ. Историкты хъуыдымæ гæсгæ, гæнæн ис, æмæ ацы ран алантæ уыдысты Боспораг паддзахад хъахъхъæнæг.
ЦИПУ-йы пресс-службæ
