Ивгъуыд фæлладуадзæн бонты Мамысоны комы уазджытæ æвдисæн уыдысты цымыдисаг акцийæн – ног хæххон курорты фæзуаты сарæзтой фыццаг арт-фестиваль. Аивадон-музыкалон хиирхæфсæн мадзал бабæрæг кодтой 2,5 мин адæймагæй фылдæр.
Фестивалы рæстæг сæ хъарутæ æрбангом кодтой нывгæнджытæ, музыканттæ æмæ æрмдæснытæ… Равдыст-армукъайы сæ куыстытæ равæрдтой, адæмон промыслæты къабазы чи кусы, уыцы курдиатджын адæм – национ æмæ нырыккон уæлæдарæс, керамикæйæ, къуымбилæй, сæрак æмæ æндæр æрмæджытæй конд сувениртæ, хъусцæджытæ æмæ риуылдаргæ рæсугъдгæнæнтæ….
Уыцы-иу рæстæг иннæ фæзыл фестивалы архайджыты фæлгонцтæ æмæ комы алæмæты æрдзы аивадон композицитæ кодтой нывгæнджытæ Апаты Азæмæт æмæ Мади Курдан. Фестиваль саразджытæ зæрдæ бавæрдтой, ацы æмæ иннæ нывгæнджыты куыстытæ курорты фидæны арт-галерейы аккаг бынат кæй бацахсдзысты, уымæй.
Культурæйы истори æмæ удварны фыдæлтыккон хæзнатæ бахъахъхъæныны, аивады дарддæры райрæзты фæндæгтæ цымыдисаг кæмæн уыдысты, уыцы адæм та байхъуыстой философон наукæты кандидат, культуролог Дарья Суховскаяйы лекцимæ.
Уæлдай ирддæр рауад фестивалы музыкалон хай. Изæрдалынгты комы сæрмæ арв срухс сæдæгæй цырæгъты тынтæй. Æмæ дæрдтыл айзæлыд ирон адæмон æмæ нырыккон электронон музыкæ. Уый гуырыд сфæлдыстадон къордтæ «Ragon bal» æмæ «Poima»-йы архайджытæ Берозты Таму, Къарджиаты Сæрмæт æмæ Александр Лестюхины зæрдæтæй, сæ къухтæ цы музыкалон инструменттыл æндзæвыдысты, уыдонæй.
Суанг изæрмæ цыдысты фестивалы мадзæлттæ…
КАЛМАНТЫ Аслан
