РЦИ-Аланийы Культурæйы министрады цы æмбырд уыд, уым хыгъд æрцыдысты нысанмæарæзт программæ «Культурæйы хъæууон кусæг»-ы ацы азы конкурсы бæрæггæнæнтæ.
Уый тыххæй «Рæстдзинад»-æн радзырдтой министрады пресс-службæйы.
Министрады минæвары ныхасмæ гæсгæ, ацы азы конкурсы архайынвæнд скодтой культурæйы къабазы кусæг 18 специалисты. Уыдоны курдиæттæм æркаст сæрмагонд къамис. Æмæ ныр къамис фехъусын кодта йæ уынаффæтæ. Афтæмæй конкурсы уæлахиздзаутæ систы 7 адæймаджы. Уыдон ныр хæстæгдæр 5 азы дæргъы хъуамæ бакусой Цæгат Ирыстоны культурæйы хъæууон уагдæтты. Программæйы уагæвæрдмæ гæсгæ, уыцы специалисттæн сæрмагонд паддзахадон æххуысы хуызы лæвæрд æрцæудзæн фæйнæ 1 милуан сомы (уыцы фæрæзтæ алчидæр схардз кæндзæн йæхи фæндонмæ гæсгæ).
Уыцы специалистты номхыгъды сты: Рахизфарсы районы Махъоты Ацæмæзы номыл сывæллæтты музыкалон скъолайы ахуыргæнæг Бедойты Валентинæ, Алагиры сывæллæтты аивæдты скъолайы ахуыргæнæг Илаты Тимур, Горæтгæрон районы Æрхонкæйы станицæйы сывæллæтты аивæдты скъолайы хореограф Тотраты Маринæ, Рахизфарсы районы Культурæйы галуаны цæугæ кусæндæтты хайады разамонæг Бæцæзаты Индирæ, Æрæфы районы Культурæйы галуаны сывæллæтты музыкалон инструментты оркестры разамонæг Максим Дубровин, Æрыдоны районы Фыййаджыбылы Культурæйы хæдзары хореографийы къорды разамонæг Сæбанты Азæмæт æмæ Алагиры районы Рæмоны-фырты поселочы Культурæйы хæдзары хореограф Хæмæтхъуаты Аминæ.
Программæ «Культурæйы хъæууон кусæг»-ы уæлахиздзаутæн нæ зæрдæ зæгъы ног æнтыстдзинæдтæ!
Калманты Аслан
