Уæрæсейы Паддзахадон Думæйы депутат МÆХЪИТЫ Зураб хæдтулгæ «Газель» балæвар кодта Сæрмагонд æфсæддон операцийы ветеранты цæгатирыстойнаг ассоциацийæн.
Транспортон фæрæзы дæгъæлтæ депутат кадджын уавæры ратта ассоциацийы сæрдар Магкæты Олегмæ. Фембæлды архайæг уыдысты ветеранты иугонды минæвæрттæ æмæ федералон фонд «Фыдыбæстæ хъахъхъæнджытæ»-йы цæгатирыстойнаг хайады разамонæг Хетæгкаты Маринæ.
Йæ цыбыр разныхасы Мæхъийы-фырт куыд фæбæрæг кодта, афтæмæй ассоциацийы уæнгтæ сты, Фыдыбæстæйы сæрвæлтау карз тохы чи балæууыд, уыцы хъæбатыртæ. Уыдон, се ’фсæддон хæс сæххæст кæнгæйæ, абон дæр иппæрд не сты сæрмагонд æфсæддон операцийы тæлмы хабæрттæй, æппæтвæрсыг æххуыс кæнынц сæ хæстон æфсымæртæн.
«Ныфс мæ ис, ацы хæдтулгæ ассоциацийы уæнгтæн зынгæ кæй фæахъаз уыдзæн сæ гуманитарон архайд фæхъомысджындæр кæнынæн. Хæсты быдыры чи ис, нæ уыцы æмзæххонтæн æппæтвæрсыг æххуыс кæнын, сæрмагонд æфсæддон операцийы тæлммæ хъæугæ уæзæгтæ ласын – уый нæ иумæйаг хæс у», – загъта Паддзахадон Думæйы депутат.
Ветеранты иугонды минæвæрттæ Мæхъийы-фыртæн арфæ ракодтой ахæм рæдау лæвары тыххæй. Сæ ныхасмæ гæсгæ, ассоциацийы уæнгтæ хорз зонынц, нæ лæппуты хæсты быдыры тынгдæр цы фæрæзтæ хъæуы, уый. Æмæ иудадзыгдæр архайынц ахæм гуманитарон уæзæгтæ сæрмагонд æфсæддон операцийы тæлммæ æрвитыныл. Ныр та сæ гуманитарон архайд уыдзæн ноджы ахадгæдæр – фæзынд сæм хи транспорт…
ТОТОЙТЫ Маринæ
