Цæгат Ирыстоны Сæргъæууæг Сергей Меняйло фембæлд федералон управлени «Упрдор Кавказ»-ы хицау Александр Лукашукимæ. Æмбырды ныхас цыди, Дзæуджыхъæуы иувæрсты федералон фæндаг Р-217 «Кавказ»-ы арæзтады проект, стæй федералон фæндаджы дыккаг æмæ æртыккаг рады рацарæзты (10-æм километрæй 25-æм километрмæ) куыстыл. Куыстытæ хъуамæ фæуой 2026 азы.
– Фæндаггон инфраструктурæйы рæзт у экономикон рæзт æмæ адæмы царды уавæртæ фæхуыздæр кæныны сæйраг рахæцæн. Мах ахсджиагыл нымайæм нырыккон æдас фæндаггон хыз саразын. Трассæ «Кавказ»-ы рацарæзт æмæ, Дзæуджы-
хъæуы иувæрсты цы фæндаг цæудзæн, уыдон сты Цæгат Ирыстоны фидæны стратегион инвестицитæ, ратдзысты фадат нæ районты ‘хсæн бастдзинад фæхуыздæр кæнынæн æмæ экономикон рæзты хъомысæн, – фæбæрæг кодта Сергей Меняйло.
– Дзæуджыхъæуы иувæрсты цы фæндаг арæзт цæуы, уый руаджы транспортæн æнцондæр гæнæнтæ уыдзæн Уæрæсейы Федерацийы субъекты мидæг, фæфидардæр уыдзысты базарадон-экономикон бастдзинæдтæ сыхаг регионтимæ. Уымæй уæлдай, транспортон инфраструктурæйы æвæрццæг ивддзинæдты руаджы фæбæрзонддæр уыдзæн стыр экономикон центрты ахадындзинад, зæгъæм, Дзæуджыхъæуæн, сæвзæрдзысты уæлæмхасæн уавæртæ инвестицитæ йæм æрбаздахынмæ, – загъта Александр Лукашук.
2021 азы апрелы куыстытæ райдайынæй фыццаг æмæ дыккаг къæпхæны 12 километры бæрц зæххын уæлцъар сæвæрдтой, 8 километры бæрц та – асфальт-бетон растгæнæн æмæ бинаг цъæрттæ. Сагъд дзы æрцыд электрон рухсытæн 830 цæджындзы.
Фæстаг рады æртæ километры бæрц æртыккаг транспортон райхæлдæн фесты къахæн куыстытæ Мæскуыйаг сосæйы цæхгæрмæ ахизæны. Федералон фæндаггон кусджытæ аразынц æппæт хъæугæ мадзæлттæ. Специалисттæ фесты фараст донсыгъдæггæнæн амаддзаджы монтаж дæр – уым, фæндæгтæй цы дон кæла, уый сыгъдæггонд цæудзæн.
Ныртæккæ кæронмæ фæхæццæ кæны, цæугæдон Чернаяйы сæрты цы хид ис, уый рацарæзт Дзæуджыхъæу – Алагиры трассæйы, машинæтæ цы фæндагыл цæуынц, уый дæр цалцæггонд æрцыд. Ахæм куыстытæ цæуынц Æрхонкæйаг сосæйæ Джызæл æмæ Ногиры ‘рдæм дæр.
Объекты 15 километры фæзуаты æвæрынц цæджындзтæ электрон рухсæн, парапетон гæрæнтæ, аразынц инженерон коммуникацитæ.
Дыргъдæтты æнæкоммерцион организацитæ «Учитель», «Дарьял» æмæ «Надежда»-йы раз дæр уыдзæн бацæуæнтæ тротуартимæ, «Учитель»-ы хæдзæртты фарсмæ та сæвæрдзысты, цæрджыты уынæрæй чи хъхъхъæна, ахæм экрантæ.
Уæ зæрдыл уын æрлæууын кæндзыстæм, Дзæуджыхъæумæ æрбацæуæны 2022 азæй нырмæ кæй ис лæвар лæууæндон хæдтулгæскъæрджытæн сæ фæллад суадзынæн 650 бынаты, уыдонæй 400 бынаты – уæзласæнтæн, 250 та – рог хæдтулгæтæн.
ГАПБАТЫ Алетæ
