Дзæуджыхъæуы скъола-гимназ «Диалог»-ы кадджын уавæры байгом кодтой Уæрæсейы Хъæбатыр Тыбылты Мараты номарæн фæйнæг æмæ цыртдзæвæн.
Раздæр куыд фехъусын кодтам, афтæмæй Дзæуджыхъæуы астæуккаг
ахуырадон скъола-гимназ «Диалог»-æн лæвæрд æрцыд Уæрæсейы Хъæбатыр Тыбылты Мараты ном. Ахæм уынаффæ рахастой республикæйы Хицауады æмбырды. Ныр скъола уыдзæн «Тыбылты Мараты номхæссæг ахуырадон центр «Диалог».
Мадзалы архайдтой РЦИ-Аланийы Хицауады Сæрдар Дзанайты Барис, Дзæуджыхъæуы бынæттон хиуынаффæйады администрацийы сæргълæууæг Милдзыхты Вячеслав, хицауад æмæ æхсæнадон организациты минæвæрттæ, цæгат-
ирыстойнаг «Росгварди»-йы æфсæддонтæ, Тыбылты Мараты ныййарджытæ æмæ хиуæттæ, скъоладзаутæ…
Гимназ «Диалог»-æн Уæрæсейы Хъæбатыры ном раттыны тыххæй РЦИ-Аланийы Сæргълæууæг Сергей Меняйломæ курдиат балæвæрдтой Тыбылты Мараты хиуæттæ æмæ хæстæджытæ. Уымæй уæлдай, Тыбылты Мараты ном хæсдзæн гимназы 7-æм кадетон кълас дæр.
Дзанайты Барис республикæйы Сæргълæууæг Сергей Меняйлойы номæй арфæ ракодта ахуыргæнджытæн, ныййарджытæн, уазджытæн, ахуырдзаутæн æмæ загъта: «Абон гимназийы байгом цыртдзæвæн Уæрæсейы Хъæбатыр Тыбылты Маратæн. Мах сæрыстыр стæм æмæ нæ рох кæнæм не ’мзæххоны сгуыхтдзинæдтæ. Уый æнусмæ баззайдзæн нæ зæрдæты, Фыдыбæстæйы сæрвæлтау йæ цард чи снывонд кодта, ахæм Хъæбатырæй. Ныртæккæ сæрмагонд æфсæддон операцийы архайынц мингай ирыстойнаг лæппутæ. Мæ зæрдæ сын зæгъы, цæмæй тагъд рæстæджы сæрæгасæй сæ хæдзæрттæм æрыздæхой. Мараты хуызæн Хъæбатырты фæрцы уыдзыстæм Уæлахиз!»
ХЪОЙБАЙТЫ Галинæ
