Æрыдоны 1-æм астæуккаг скъолайы ацыд историон-патриотон проекты фыццаг мадзал. Æххæстгонд цæуы клуб «Альбус» æмæ «Фыдыбæстæ хъахъхъæнджытæ»-йы фонды æххуысæй. Йæ саразджыты фæндонмæ гæсгæ фембæлды фыццаг хайæ ссардтой Фыдыбæстæйы Стыр хæсты архайджыты ном, дыккаг хайы та ныхас цыд сæрмагонд æфсæддон операцийы тыххæй.
Фембæлды райдайæн рæзгæ фæлтæрæн интерактивон лекци сарæзта Адæмон фронты Цæгат Ирыстоны регионалон æххæстгæнæн комитеты разамонæг
Гæлиты Клим. Стæй ахуырдзауты раз раныхас кодта сæрмагонд æфсæддон операцийы архайæг Магкæты Олег. Уый рæзгæ фæлтæрæн радзырдта, цæмæн ацыд Украинæмæ, куыд мысыд йæ хæстон æмбæлтты. Йæ риу тæмæнтæ чи калы, уыцы хæрзиуджытæй æппæты стырдæр аргъ кæй кæны майдан «Хъæбатырдзинады тыххæй»-æн.
Ахуырдзаутæ лæмбынæг хъуыстой æфсæддонмæ æмæ йæм лæвæрттой фарстытæ дæр: кæм службæ кодта, сабийæ цавæр спорты архайдта, сывæллæттæ йын ис, æви нæ, æфсады сæ исчи службæ кæны æви нæ, куыд сыл сæмбæлдысты сæрибаргонд зæххыты цæрджытæ.
– Ис ахæм фарстытæ, хатт ас адæймаг дæр бæлвырд дзуаппытæ кæмæн не ссары. Фæлæ, сæйрагдæр, сывæллæттæ нæ фембæлды рæстæг бамбæрстой, раздæр дæр кæй уыдис, Фыдыбæстæ чи хъахъхъæдта, ахæм хъæбатыртæ, сты не ’хсæн абон дæр, – дзырдта клуб «Альбус»-ы президент Жаннæ Бориева.
Разæй сæм æнхъæлмæ кæсы командæты интеллектуалон хъазт «Нæхи Уæлахизыл барæм», уый фæстæ та – проекты кæронбæттæн хай, телевикторинæ «Æхсардзинады фæндæгтыл». Иннæ фембæлд уыдзæн Дыгуры районы. Проекты æххуысгæнджытæ сты: РЦИ-Аланийы «Фыдыбæстæ хъахъхъæнджытæ»-йы фонд, РЦИ-Аланийы Сæрмагонд æфсæддон операцийы ветеранты ассоциаци, РЦИ-Аланийы Адæмон фронт, РЦИ-Аланийы Фæсивæды хъуыддæгты комитет æмæ РЦИ-Аланийы Ахуырад æмæ наукæйы министрад. Проект æххæстгонд цæуы УФ-йы Президенты гранттæ æмæ финансон æххуысты фæлгæты.
Саутæты Тамилæ
