Ахуырады къабаз Кировы районы цæуы рæзты фæндагыл. Афтæ кæй у, ууыл дзурæг сты, цы ивддзинæдтæ дзы цæуы, уыдон.
Фæстаг дыууæ азы район разæнгардæй архайы ахуырады къабаз райрæзыны æмæ
ахуыргæнджыты дæсны-йад фæбæрзонддæр кæныны федералон проектты. Уый фæрцы цалцæггонд æрцыд цыппар скъолайы, нырыккон домæнтæн дзуапп дæттын райдыдта сæ материалон-техникон бындур, базылдысты хæрæндæттæм. Ацы аз та программæ аххæссыд рæвдауæндæттыл дæр.
Дарддæр æххæстгонд цæуынц национ проект «Ахуырад»-ы мадзæлттæ. Æппæт скъолаты дæр кусынц ахуырадон центртæ «Рæзты тæлмытæ». Ахуырады хæрзхъæддзинадыл алкæддæр дзурæг сты рауагъдонты паддзахадон фæлварæнтæ. Ивгъуыд аз районы скъолаты рауагъдонтæн сæ 98 проценты – 92 ахуырдзауы – райстой астæуккаг ахуырады тыххæй æвдисæндар, æмæ æрмæстдæр сæ дыууæ проценты – 2 адæймаджы та – нæ. Паддзахадон аттестацийы бæрæггæнæнтæм гæсгæ, фыццаг къæпхæны майдантæ райстой 15 адæймаджы, дыккаг къæпхæны майдантæ та – 3.
2024 азы фарæстæм кълæсты рауагъдонтæ уыдысты 269, æмæ се ‘ппæт дæр райстой бындурон иумæймаг ахуырады тыххæй æвдисæндартæ. Уыимæ дзы 15 адæймаджы фараст къласы фесты иттæг хорз бæрæггæнæнтимæ æмæ сын лæвæрд æрцыд сæрмагонд хуызы æвдисæндартæ.
Æппæтуæрæсеон олимпиадæтæ сты курдиатджын скъоладзауты зонындзинæдтæ сбæрæг кæныны замманай фæрæз, æмæ дзы чи архайы, районы уыцы скъоладзауты нымæц азæй-азмæ кæны фылдæр. Ивгъуыд аз алыхуызон олимпиадæты архайдтой 241 скъоладзауы. Уыдонæй 47 систы муниципалон къæпхæны уæлахиздзаутæ, призертæ – 43 адæймаджы, республикон къæпхæны та уыд 4 призеры.
Культурæйы бынтимæ æрыгæттæ цæмæй зонгæ кæной æмæ культурæмæ уой æввахсдæр, уымæн хорз ахъаз у «Пушкинская картæ». 14-18-аздзыд ахуырдзаутæ дзы пайда кæнынц, республикæйы музейтæм, кинотеатртæ æмæ театртæм цæугæйæ. Абоны бонмæ ахæм картæйæ пайда кæнынц районы уыцы кары скъоладзаутæн сæ 70,9 проценты.
Ахуырады къабазы ахсджиаг фæзилæнтæй иу у профориентаци. Профориентацион куыст ивгъуыд аз аххæссыд районы 430 скъоладзауыл, Змейкæйы станицæйы 1-æм скъолайы бындурыл та байгом «Курчатоваг кълас».
2024 ахуырадон аз 298 скъоладзауы лæвæрдтой ГТО-йы нормæтæ, уыдонæй 143 адæймаджы райстой ГТО-йы сыгъзæрин нысан, 83 – æвзист æмæ 39 – бронзæ нысан.
Районы стыр æргом здæхт цæуы скъола-дзауты æнæниздзинад бахъахъхъæнынмæ. Афтæ, сæрдыгон фæлладуадзæн рæстæг районы фондз скъолайы куыстой, сывæллæттæ боныгон кæм улæфыдысты, ахæм лагертæ.
Рæвдауæндæттыл ныхас кæнгæйæ, æнæзæгъгæ нæй, скъолайы агъоммæйы ахуырад фæстаг цалдæр азмæ кæй аххæссыд æппæт ацы кусæндæттыл. Сывæллон рæвдауæндонмæ раттыны тыххæй рады лæууын ныййарджыты нал хъæуы.
ДЕДЕГКАТЫ Зæлинæ
