РЦИ-Аланийы Хицауады Сæрдар Дзанайты Барисы разамындæй цы æмбырд арæзт æрцыд, уым æркастысты 2026 азмæ районты бюджетты сæйрагдæр хæрдзтæ æмæ æфтиæгтæм.
Мадзалы куысты архайдтой республикæйы финансты министры хæстæ рæстæгмæ æххæстгæнæг Оксанæ Карова, РЦИ-Аланийы Парламенты минæвæрттæ, районты финансты управлениты разамонджытæ, регионы муниципалон скондты сæрдартæ.
Муниципалитетты разамонджытæ лæмбынæг радзырдтой, фидæны азмæ сæйраг финансон документыл куыст куыд цыди, уый тыххæй. Куыд фæбæлвырд кодтой, афтæмæй сæйрагдæр æргом аздæхтой цæрджыты раз социалон хæсистытæ (обязательства) сæххæст кæнынмæ.
Дзанайты Барис сын сæ зæрдыл æрлæууын кодта, муниципалон скондты бюджеттæ аразынмæ бæрнон æмæ хæдзардзинæй бацæуынимæ æнгом баст кæй сты районты рæзт æмæ граждæнты фæрныгад. Хицауады Сæрдар сын бахæс кодта сæхи æфтиæгты бæрц фылдæр кæнын, стæй иудадзыг сæ цæст дарын, æппæт социалон хæсистытæ куыд æххæстгонд цæуынц, уымæ.
– Нæ сæйрагдæр нысан – бюджетон къабазы кусджытæн мызд фидын æмæ социалон æххуысады æппæт мадзæлттæ æххæст кæнын. Уымæй уæлдай ма алы районы фæзуаты дæр арæзт, цалцæггонд æмæ ифтонггонд цæуынц, социалон нысаниуæг кæмæн ис, бирæ ахæм объекттæ. Уый тыххæй субъект архайы паддзахадон прог-
раммæтæ æмæ национ проектты. Республикæйы Сæргълæууæг Сергей
Меняйло нын нæ размæ цы хæс æвæры, уымæ гæсгæ æппæт мадзæлтты дæр хæрдзты хай химæ райсыныл дæр бацархайын хъæуы, – загъта Дзанайты Барис.
Премьер-министр уæлдай æргом аздæхта бынæттон бюджетты хи æфтиæгтæ фæфылдæр кæныны фарстамæ.
– Районтæ хъуамæ архайой сæхи æфтиæгтæ бæрзонддæр кæныныл, æппæт хуызы хъалонтæ æмбырд кæнын, бизнесы минæвæрттимæ кусын æмæ, сусæгæй чи кусы, уыдон æргом кæныны руаджы, – фæбæрæг кодта Дзанайты Барис.
ГАПБАТЫ Алетæ
