Ног регионтæ – Луганск æмæ Донецкы Адæмон Республикæтæ, стæй Херсон æмæ Запорожьейы облæсттæ – Уæрæсейы Федерациимæ цы бон баиу сты, уыцы боныл æртæ азы кæй сæххæст, уый кадæн, стæй бархион проект «Хæлардзинады маяктæ. Кавказы мæсгуытæ-2025» æххæст кæныны фæткмæ гæсгæ, Алагиры районы пъæлицæйы кусджытæ архайдтой радон экологион акцийы.
Дзыллон мадзал сарæзтой Алагирмæ бацæуæн фæндагмæ ’ввахс ран æрбынæттонуæвæг Т-34 таурæгъон танчы раз. Цæрæн бынаты æвдисæндарыл нымад амынд танк сæвæрдтой Фыдыбæстæйы Стыр хæсты заман фæмардуæвæг æмзæххонты рухс нæмттæ ссарынæн. Барадхъахъхъæнджытимæ иумæ экологион акцийы архайдтой горæты 5-æм скъолайы змæлд «Фыццæгтæ»-йы активисттæ, «Хæлардзинады маяктæ. Кавказы мæсгуытæ-2025»-ы проекты бархионтæ, стæй къорд «Хъонахътæ»-йы уæнгтæ. Акцийы архайынмæ кæй æрбахуыдтой, уыдоны ‘хсæн уыдысты Уæрæсейы ног регионты цæрæг адæймæгтæ дæр.
Дзыллон мадзалы архайджыты раз ныхас кæнгæйæ, амынд ахуыргæнæндоны директор Айларты Иринæ куыд загъта, афтæмæй уазæгуарзондзинад у ирон адæмы арфæйагдæр миниуджытæй иу. Фембæлды фæрцы алагирæгтæ мидисджын ирон культурæ равдисыныл бацархайдтой.
Æмбæлгæ кусæнгæрзтæ райсгæйæ, дзыллон мадзалы архайджытæ номарæн комплексы фæзуат бафснайдтой. Уымæй уæлдай, проекты архайджытæ сæхимæ райстой Алагиры районы ирон адæмы рагон царды æвдисæныл нымад Хуырымты мыггаджы мæсыг ногæй саразыны хæс. Акцийы архайджытæн амыдтой ирон культурæимæ баст мастер-класстæ.
Проект «Хæлардзинады маяктæ. Кавказы мæсгуытæ-2025» ахъаз кæны алы адæмыхæттыты æгъдæуттæ æмæ царды уаг хуыздæр рахатынæн.
Гæззаты Зæринæ,
Алагиры районы
мидхъуыддæгты
хайады инспектор
