Ницæимæ ис абарæн сабийы бахудт, йæ фыццаг ныхас, йе змæлд, йæ тырнындзинад размæ. Уыдæттæ йæ ныййарджытæн, стæй æрмæст уыдонæн нæ, фæлæ не ‘ппæтæн дæр свæййынц цины хос. Нæ бæстæйы разамынд æппæт тыхтæй архайы ныййарæгæн алыхуызон удæнцойдзинæдтæ саразыныл, йæ фыдæбон ын фæрогдæр кæныныл.
Уæрæсейы бюджеты 2026 азмæ бавæрдтой бинонтæн социалон æххуыс бакæныны нысанæн 18,7 миллиард сомы. Уыцы æххуысмæ хауынц пенси æмæ материалон æххуысы фæрæзтæ. Кæд æмæ фыццаг сывæллонæн ныййарæджы капитал нæ райстой, уæд дыккаг сывæллоны фæзындæн хъуамæ ныййарджытæ райсой 974,1 мин сомы. Фæрæзтæ индексацигонд æрцæудзысты, инфляци нымайгæйæ, 6,8 проценты онг.
Фыццаг сывæллонæн ныййарæджы капитал та уыдзæн 737,3 мин сомы. 2026 азы фæфылдæр уыдзысты пособитæ æмæ сывæллоны райгуырды фæдыл фиддонтæ. Иухаттон бафыст ныййарæгæн суыдзæн 28773 сомы. Кусгæ цы æнхъæлцау сылгоймаг кæны, уый исдзæн 955,8 мин сомы (декреты ацæуынæй 140 боны размæ). Цалынмæ сабийыл 1,5 азы нæ сæххæст уа, уæдмæ, кусгæ чи кæны, уыдон алы мæй дæр
исдзысты 83 мин сомы.
Дыууæ æмæ фылдæр сывæллоны кæмæн ис, уыцы ныййарджыты уды рæстæмбис æфтиаг фæцæрыны æппынкъаддæры бæрцæй 1,5 хатты фылдæр куы нæ уа, уæд сын се ‘фтиæгтæй цы хъалон фидынц, уымæй йæ 7 процентæй фæстæмæ лæвæрд
цæудзæн. Уыцы нысантæн бюджеты æвæрд æрцыд 119 миллиард сомы.
Куыд рабæрæг, афтæмæй иухаттон бафыстæн сывæллонджын бинонтæн Уæрæсейы бюджеты сæвæрдтой 1,76 триллион сомы. Фæрынчыны тыххæй сыфмæ гæсгæ фиддзыс-ты 27 мин сомы бæрц. Фæфылдæр уыдзæн фæрынчыны æмæ æнхъæлцау уæвыны æмæ сабийы райгуырды фæдыл фиддоны бæрц дæр – схæццæ уыдзæн 20 процентмæ. Хæстон службæйы уæвæг нæлгоймæгты бинойнæгтæн иухаттон бафыст лæвæрд цæудзæн, сылгоймаджы сæрыхицау æфсады кæд ис кæнæ та хæстон училищæйы фыццаг курсы ахуыр кæны, уæд. Ныртæккæ пособийы бæрц у 42665 сомы.
Пособи райсыны тыххæй хъуыддæгтæ сфидар кæнæн ис дæрддзæгмæ хуызы, паддзахадон лæггæдты порталы фæрцы, кæнæ та Социалон фонды цæгатирыстойнаг хайады клиентон службæмæ бацæугæйæ. Саразæн сæ ис бирæфадатджын центрмæ бацæугæйæ дæр. Службæйы фæуды фæстæ афæдз æмæ æрдæг куы рацæуа, уæд ис фæрæзтæ райсынмæ æрхатын. Бахъæудзæн дзы хæстон хайæ справкæ, райсæн æй ис хæстон камиссарадæй дæр.
Курдиат хъуамæ равзарой 10 бонмæ, йемæ сразы уæвгæйæ, æхца 5 бонмæ хъуамæ æрвитой. Сывæллон куыддæр фæзына, афтæ Социалон фонды цæгатирыстойнаг хайад дæр хæстон службæйы уæвæг нæлгойма-джы бинойнагæн алы мæй дæр фиддзæн 18285 сомы. Фæрæзтæ райсыны тыххæй æрхатæн ис Фонды хайадмæ.
Социалон фонды
цæгатирыстойнаг
хайады пресс-службæ
