Мариинаг театры аивадон разамонæг, театры генералон директор æмæ Стыр театры генералон директор Гергиты Валери куыд радзырдта, афтæмæй йæхицæн хæсыл нымайы, цæмæй Дзæу-джыхъæуы Оперæ æмæ балеты театр схиза аккаг, бæрзонд æмвæзадмæ.
«Мæ цæстæй акæсгæйæ, хъуамæ Дзæуджыхъæуы Мариинаг театрæн йæ
хайад куса æппынæдзух, ома, æрмæст фестивальты (Мариинаг-Дзæуджыхъæу) рæстæг нæ. Дыууæ коллективы ‘хсæн хъуамæ уа фидар бастдзинад, уымæн æмæ уый уыдзæн дзурæг, музыкалон æмæ театралон традицитæн аскъуыйæн кæй нæй, ууыл. Абон та уымæй тæссаг у, нæ бæстæйы регионтæ йæ æвзарынц.
Дзæуджыхъæуы историон бакаст сног кæныныл банымайæн ис Патеты æфсымæрты кинотеатры рацарæзт. Сывæллон ма куы уыдтæн, уæд дзы уыд кинотеатр «Фæскомцæдисон», уым фыццаг хатт федтон кинонывтæ «Обыкновенный фашизм», «Александр Невский», «Маугли».
Нæ республикæйы бирæ ис номдзыд актертæ дæр, зыдтой сæ æнæхъæн Советон Цæдисы. Зæгъæм, Тæбæхсæуты Бало, Уататы Бимболат æмæ иннæтæ. Мæ ахуыргæнджыты ма æрхъуыды кæнон, уымæн гæнæн нæй. Анатолий Брискин, Лолаты Заремæ… Мæн фæнды, цæмæй сæ нæмттæ баззайой фæлтæрты мысинæгты. Уый тыххæй хъуамæ бæлвырд хъуыддæгтæ саразон.
Дзæуджыхъæуы хъуамæ уа хи оркестр, Оперæ æмæ балеты театр, уыимæ аккаг æмвæзады. Цæмæй дæ ахуыргæнджыты нæмттæ баззайой фæлтæрты зæрдæты, уый тыххæй хъуамæ республикæйы ахуыр кæной хорз æмвæзады. Хъуамæ Мариинаг театры æппæт фæзты Дзæуджыхъæуы кусой сывæллæтты бирæ программæтæ. Æппæт дунейы рæзгæ фæлтæр дæр иухуызон æнкъарынц классикон музыкæйы зæлтæ, сæ рæсугъддзинад.
Хъуамæ уыцы фадатæй ирыстойнаг сабитæ хай-джын уой, уыцы авналæнтæ сын хъуамæ фæзыной. Мариинаг театр æмæ ма Стыр театры хъомысæй спайда кæндзынæн, уымæн дæр æз дæн йæ разамонæг», – загъта Гергиты Валери «Уæрæсейаг газет»-æн йæ интервьюйы.
