Цæгат-Кавказаг суворовон хæстон училищæйы курсанттæ сæрмагонд æфсæддон операцийы архайджытæн æрæмбырд кодтой æрвыстæг. Уым сæвæрдтой акоппы хъæугæ цырæгътæ, аууоны хызтæ, хойраг, фæсмын цъындатæ, резинæ цырыхъхъытæ.
Уый у стыр гуманитарон æххуысы иу хай, арвитдзæн æй Сырхтырысаджын Воронежскаг-Шумлинскаг мотоæхсæн 19 дивизи. Сæхи къухтæй Цæгат-Кавказаг суворовон хæстон училищæйы курсанттæ скодтой акъоппы хъæугæ цырæгътæ. Уый блиндажæн æрмæст хъарм нæ дæтты, фæлæ æвдисы æххуысы æууæл. Алы курсантæн дæр ис куысты хи хай, алчидæр æмбары, Уæлахизмæ æвæрæн кæй æрвиты, уый. Сæ куыст кæнынц ахуырæй уæгъд рæстæг, аууоны хызтæ дæр бийынц, уымæй та техникæ бамбæхсæн ис.
Æлборты Эмир ротæйы старшина у, кæстæр сержант æмæ зæгъы, сæрмагонд æфсæддон операцийы чи ис, уыдоны бынаты æхсызгондзинад кæй банкъарид, ахæм æххуыс райсгæйæ. «Хæдзарæй узæлд, хъарм цæстæнгас æмæ ахаст æнкъарын мын æнцон уаид. Мах балæууыдыстæм аууоны хызтæ бийыныл. Акъоппы цырæгътæ аразæм, гуманитарон æххуыс æрвитæм. Æмбарæм: уым зын у уæвын æмæ сæм нæ бон уазал цæстæй кæсын нæу», – загъта Æлборы-фырт.
Сæрмагонд æфсæддон операци куыддæр райдыдта, афтæ гуманитарон
æххуыс æрвитынц суворовонтæ. Уый ахадындзинад æмбарынц фидæны æмæ ныры афицертæ. Се ‘мрæнхъ æрлæууыдысты ныййарджытæ дæр, балхæнынц хъæугæ æрмæг.
Гæззаты Даниэль, Суворовон училищæйы 6-æм курсы хицау, хистæр хъомылгæнæг, зæгъы: «Училищæ стыр æргом здахы хæстон-патриотон хъомыладмæ. Нæ рауагъдонтæй бирæтæ сты сæрмагонд æфсæддон операцийы архайджытæ. Чи фæмард, уыдоны нæмттæ нæ зæрдæты хæссæм. Йæ хæстон хæс чи æххæст кæны, уыдонæн та æххуыс æрвитæм».
Сырхтырысаджын Воронежскаг-Шумлинскаг мотоæхсæн 19 дивизийы хистæр афицеры æххуысгæнæг Наталья Ракитянская куыд радзырдта, афтæмæй ацы гуманитарон æххуыс æмбырд кæнынц нæ меценаттæ æмæ хъæздгуытæ нæ, фæлæ Ирыстоны цæхæрзæрдæ цæрджытæ. «Хуымæтæг адæмæн сæ зæрдæтæ куыд амонынц, афтæ бавнæлдтой æххуыс кæнынмæ. Раззаг хаххыл чи лæууы, уыдонмæ йæ æрвитынц, æвдисынц бастдзинад. Уырдыгæй цы фарстатæ æрбахæццæ вæййынц, уыдонæн мах агурæм фадæттæ. Суворовон училищæмæ æрæджы фæсидтæн, æмæ нын баххуыс кодтой, уый фыццаг хатт нæу. Зæгъын сын бузныг, ахæм бæрнон сывæллæттæ кæй хъомыл кæнынц, уый тыххæй», – загъта хистæр афицеры æххуысгæнæг.
Кочиты Элианорæ
