Знон РЦИ-Аланийы Мыхуыр æмæ дзыллон коммуникациты хъуыддæгты фæдыл комитеты Мæздæджы районы газет «Моздокский вестник»-ы 95 азы юбилейы кадæн схорзæхджын кодтой, бирæ азты дæргъы дзы зæрдиаг фæллой чи кæны, районы цæрджыты æрвылбоны хабæрттимæ чи зонгæ кæны, уыцы дæсны æмæ курдиатджын журналистты.
РЦИ-Аланийы Сæргълæууæджы номæй сын зæрдиаг арфæтæ ракодта уæлдæр амынд комитеты сæрдары хæстæ рæстæгмæ æххæстгæнæг Эльдар Афашоков. Уый радзырдта, куыд ахсджиаг у ацы районæн мыхуыры фæрæз, уый тыххæй.
– Газетыл сæххæст 95 азы, æмæ уый аккаг æфсон у сымахæн арфæтæ нæ республикæйы Сæргълæууæг æмæ комитеты номæй ракæнынæн. Газет «Моздокский вестник» абоны онг дæр нымад æмæ хъæугæ мыхуыры фæрæз у. Районы адæм æй уарзынц æмæ йæ зæрдиагæй кæсынц. Нæ йыл сивтой сæ зæрдæ дæр. Фондз азы фæстæ йæ сæдæ азы юбилей сбæрæг кæндзыстæм æппæт Ирыстоны дæр. Мæнæн та бар раттут РЦИ-Аланийы Сæргълæууæджы номæй уын уæ фæллойæн аргъ скæнынæн, кадджын хæрзиуджытæй уæ схорзæхджын кæнынæн, – загъта Эльдар Афашоков.
Республикæ Цæгат Ирыстон-Аланийы Сæргълæууæджы Указмæ гæсгæ, журналистикæйы къабазы æнтыстджын фæллойы тыххæй майдан «Ирыстоны Намысæн» лæвæрд æрцыд Тотойты Светланæйæн;
Республикæ Цæгат Ирыстон-Аланийы сгуыхт журналисты кадджын ном саккаг кодтой Бæдзиаты Ларисæйæн;
Республикæ Цæгат Ирыстон-Аланийы Кады гæххæтт лæвæрд æрцыд Светланæ Ильинайæн;
РЦИ-Аланийы Мыхуыр æмæ дзыллон коммуникациты хъуыддæгты фæдыл комитеты Кады гæххæттытæ та райстой Александр Прокопов, Николай Пилипчук æмæ Сакъиты Кристинæ.
Саутæты Тамилæ,
къам систа
Татьянæ Шеходанова
