Республикæйы Сæргълæууæг Сергей МЕНЯЙЛО дзы сæрдари-уæг кодта, афтæмæй уыд РЦИ-Аланийы Хицауады радон æрвылкъуырион аппаратон æмбырд. Министртæ, ведомствæтæ æмæ районты разамонджытæ ныхас кодтой ивгъуыд къуырийы бæрæггæнæнтæ æмæ ног нысантыл.
Ивгъуыд къуырийы бæрæггæнæнты тыххæй доклад бакаст Хицауады Сæрдары хæдивæг Томайты Ирбег. Йæ ныхасмæ гæсгæ, республикæйы оперативон уавæр у нывыл.
– Цæгат Ирыстоны сæрмагонд службæтæ арха-йынц æрвылбоны уавæрты. Транспорты æппæт хуызтæн дæр фадат ис Арвыком æмæ Транскамы фæндæгтыл ацæуынæн. Арвыкомы фæндагыл ацæуынмæ æнхъæлмæ кæсынц 1200 автотранспортон иуæ-
джы, уыдонæй 780 – сæрмагонд бынæтты. Ивгъуыд къуырийы дæргъы Уæрæсе æмæ Гуырдзыстоны арæныл дыууæрдæм ахызтысты 22,9 мин автотранспортон
иуæджы æмæ 56,3 мин адæймагæй фылдæр, – загъта Томайы-фырт.
РЦИ-Аланийы Мидхъуыддæгты министрад фехъусын кодта, ивгъуыд къуырийы дæргъы цалдæр скъолайы рæму-дзæн æрмæг бавæрдтой, зæгъгæ, мæнг хъусынгæнинаджы тыххæй.
Дзæуджыхъæуы ресторантæй иуы фæсивæд кæй фæхыл сты, уый фæдыл Сергей Меняйло бахæс кодта æдасдзинады мадзæлттæ фæкарздæр кæнын. Регионы разамонæг Хицауады Сæрдары хæдивæг Томайты Ирбегæн бафæдзæхста ацы фарстамæ æркæсын.
– Уавæрмæ лæмбынæгдæр æргом аздахын хъæуы. Хъуамæ зонæм, кæм цы цæуы, уый æмæ аразæм æдасдзинады мадзæлттæ, – загъта республикæйы разамонæг.
Цæгат Ирыстоны автоинспекцийы хъусынгæнинагмæ гæсгæ, фæстаг къуырийы дæргъы респуб-ликæйы фæндæгтыл æрцыд 97 фæндаггон фыдбылызы. Алыхуызон цæфтæ дзы баййæфтой 21 адæймаджы, æмæ сæ æвæстиатæй рынчындæттæм аластой. Хъыгагæн, иу адæймаг дзы фæмард ис.
Республикæйы «Роспот-ребнадзор» куыд хъусын кæны, афтæмæй эпидемиологон уавæр у нывыл. ОРВИ æмæ грипп бæрæггонд не ’рцыд.
Сергей Меняйло разы нæу республикон Æнæниздзинад хъахъхъæнынады министрады куыстæй. Сæрмагондæй ныхас цыд Куырттаты комы пульмонологон рынчындоны уавæрыл. Регионы разамонæг бафæдзæхста зæронд бæстыхайæн экспертизæ скæнын, цæмæй сбæрæг кæной, ис ма йæ сцалцæг кæнæн, æви ног саразын хъæуы.
Республикæйы «Водоканал»-ы хъусынгæнинагмæ гæсгæ, дон-уадзæн системæйы авари кæй æрцыд, уый аххосæй Дзæуджыхъæуы 33 æмæ 34 микрорайонты дон нæ
уыдзæн. Сергей Меняйло сын бахæс кодта, ахуыргæнæн æмæ медицинон уагдæттæ донхъуаг куыд нæ уой, уый. «Водоканал»-ы кусджытæ хатыр курынц цæрджытæй æмæ архай-дзысты, цæмæй цыбырдæр рæстæгмæ фæстиуджытæ аиуварс кæной.
Дзæуджыхъæуы Гагарины уынджы скверы кæронмæ фæхæццæ кæнынц, къæпхæнæй чи цыд, уыцы цалцæггæнæн куыстытæ. Фыццагдæр уал ауагътой электрон кабель, бауагътой рухс, сцалцæг кодтой къахвæндæгтæ, сывæллæттæн дзы сарæзтой хъазæн фæзуат, сæвæрдтой бандæттæ æмæ бырондæттæ. Ныртæккæ йæм баластой мæр, цæмæй йын йæ уæлцъар слæгъз кæной.
– Мæн уырны, кæддæр æнæзылд цы фæзуат уыд, уый ныр нæ горæты цæрджытæ æмæ йæ уазджытæн фæлладуадзæн бынат кæй уыдзæн. Уæ зæрдыл уын æрлæууын
кæндзынæн: цалцæггæнæн куыстытæ цæуынц муниципалон программæ «Фæрныгад æмæ цъæхфæлыст»-ы фæлгæты, – загъта Дзæу-джыхъæуы администрацийы сæрдар Милдзыхты Вячеслав.
РЦИ-Аланийы ахуырад æмæ наукæйы министр Алыбегты Эллæ куыд
радзырдта, афтæмæй республикæйы 13 скъолайы дарддæр дæр цæуынц бындурон цалцæггæнæн куыстытæ.
Республикæйы Сæргълæууæг сбæрæг кодта, Къостайы проспекты Нарты кадджыты хъайтарты скульптурæтæ æдзæллаг уавæры кæй сты, уый. Дзæуджы-хъæуы администрацийæн бахæс кодта уыцы фарстамæ æркæсын.
Хъойбайты Галинæ
