Дзæуджыхъæуы Цæгат-Ныгуылæйнаг æмæ Терчыфалейы районты администрацийы хъæппæрисæй Афгайнаг скверы арæзт æрцыд дзыллон зиу.
Фæлгонцад æмæ сыгъдæгдзинады акцийы архайдтой Дзæуджыхъæуы бирæкъабазджын æмæ Цæгат Кавказы арæзтадон техникумты ахуырдзау-тæ, компанитæ «ЖСК-2» æмæ «Бирæфатерон цæрæн хæдзæртты 10-æм управлени»-йы кусджытæ, раздæры æфсæддонтæ-«афгайнæгтæ» æмæ микрорайоны цæрджытæ.
Цалдæр сахатмæ зиууæттæ парчы фæзуат асыгъдæг кодтой æмæ алыхуызон бырæттæ бавгæдтой дыууæ уæзласæн хæдтулгæйы гуыффæты.
Кæронбæттæны æхсæнадон проект «Лесотерапия»-йы архайджытæ зиууæтты саходын кодтой тæвд цай æмæ адджинæгтæй.
Сæрмагондæй зæгъын æмбæлы, зиуы архайджытæй иу Фыдыбæстæйы Стыр хæсты ветеран Пагæты Алыксандр кæй уыд, уый. Пагæйы-фырт разыйæ баззад, горæты цæрджытæ сыгъдæгдзинады мадзалмæ зæрдиаг æргом кæй раздæхтой, уымæй. Ветераны хъуыдымæ гæсгæ, ахæм акцитæ арæхдæр аразын хъæуы.
Нæ уацхæссæг
