Аэропорт «Дзæуджыхъæу»-ы дунеон терминалы бындурон рацарæзт ахицæн уыдзæн 2026 азы кæронмæ. Уый фæрцы фæфылдæр кæндзысты фæсарæйнаг бæстæтæм уæлдæфон балцыты нымæц.
Уый тыххæй компани «Новапорт Холдинг»-ы генералон директоры хæдивæг Роман Чуев фехъусын кодта, информацион агентад «ТАСС Кавказ»-ы йын цы пресс-конференци уыд, уым.
Компанийы бæрнон кусæджы ныхасмæ гæсгæ, уæлдæфон вагзалы дунеон терминал æрбынæттон уыдзæн аэропорты раздæры зæронд бæстыхайы фæзуаты. Уыцы агъуысты бындурон рацарæзт райдыдта 2024 азы. Куыд нысангонд цæуы, афтæмæй куыстытæ хъуамæ æххæстгонд æрцæуой 2026 азы. Рацарæзты проекты аргъ у 3 миллиард сомы бæрц.
Терминалы рацарæзт куы ахицæн уа, уæд фæзындзæн Дзæуджыхъæ-уæй фылдæр фæсарæйнаг бæстæтæм абалц кæныны фадат. Ныртæккæ та уал, уæрæсейаг горæттæй уæлдай, ирыстойнаг бæлццæтты хæдтæхджытæ фæхæццæ кæнынц Турк æмæ Египетмæ.
Роман Чуевы ныхасмæ гæсгæ, азы райдайæнæй нырмæ аэропорт «Дзæуджыхъæу»-ы лæггæдтæй спайда кодтой 640 мин бæлццонæй фылдæр. «Фаронимæ абаргæйæ, бæлццæтты нымæц иуцасдæр фæкъаддæр уыдзæн (рагагъоммæ нымадмæ гæсгæ, 5-7 проценты бæрц). Уыимæ, иннæ цæгаткавказаг аэропортты уавæр дæр ахæм у (Налцыккæй фæстæмæ). Уыцы æууæл «Дзæуджыхъæу»-ы иумæйаг куыстæн уыйбæрц зынгæ нæ уыдзæн, бацархайдзыстæм, ныртæккæ нæ бæрны цы уæлдæфон маршруттæ ис, уыдон бахъахъхъæныныл», – бафиппайдта Роман Чуев.
КАЛМАНТЫ Аслан
