Цæгат Ирыстоны дарддæр æххæстгонд цæуы нысанмæарæзт программæ «Хъæууон ахуыргæнæг». Уый фæткы бындурыл 2025 азы республикæйы хъæууон скъолатæ куысты бынатæн равзæрстой 10 ахуыргæнæджы.
Программæйы ацы азы архайджытимæ фембæлд РЦИ-Аланийы ахуырад æмæ наукæйы министр Алыбегты Эллæ. Уый сын ратта фæйнæ 1 милуан сомы аргъ сертификаттæ, стæй семæ аныхас кодта ахуырады къабазы дарддæры райрæзты нысантыл.
Министры ныхасмæ гæсгæ, программæйы ацы азы архайджытæн сæ фылдæр сты математикæйы ахуыргæнджытæ. «Арæхдæр уыцы предметы специалисттæй хъуагдзинад æййафынц хъæууон скъолатæ», – бафиппайдта министр.
Ныхасы архайджытæ разыйæ баззадысты сæ фембæлдæй.
– Æхсызгон мын уыд программæйы æрыгон архайджытимæ фембæлын, сæ хъуыдытæ æмæ фæндæттæм сын байхъусын. Уыимæ, æрдзырдтам сæ тыхстаг фарстатыл дæр. Зæгъæм, транспортон бастдзинады аиппытимæ бастæй программæйы архайджытæй иуæй-иутæ къуылымпытимæ æфтынц сæ куысты ног бынæттæ – дæрддзæф хъæутæм. Уыцы фарстамæ раздах-дзыстæм муниципалон администрациты æргом, иумæ æркæсдзыстæм ахуыргæнджытæн цæрæнуæттæ дæттыны хъуыддагмæ дæр. Уы-имæ, фæндон бахастон, программæйы чи архайы, уыцы ахуыргæнджытæн – саразын сæрмагонд профессион педагогон иугонд. Уыцы структурæйы фæрцы æнцондæр уыдзæн лыггæнинаг фарстатæ рæгъмæ хæссын, стæй профессион рæзты хъуыддæгтыл кусынæн, кæрæдзийы фæлтæрддзинадимæ хуыздæр зонгæ кæнынæн, – æмбырды фæстæ бафиппайдта Алыбегты Эллæ.
Нысанмæарæзт программæ «Хъæууон ахуыргæнæг» Цæгат Ирыстоны æххæстгонд цæуы 2020 азæй фæстæмæ (ныр программæ у фыццаградон национ проект «Фæсивæд æмæ сывæллæттæ»-йы сæрмагонд дæлхайад). Уæдæй нырмæ программæйы уагæвæрды бындурыл хъæууон скъолаты кусын райдыдтой 50 специалисты бæрц – уырыссаг æмæ фæсарæйнаг æвзæгты, математикæйы, физикæйы, химийы, информатикæ æмæ биологийы ахуыргæнджытæ. Уыимæ, программæйы архайджытæн сæ фылдæр (18 ахуыргæнæджы) систы Мæздæджы районы скъолаты ахуыргæнджытæ.
СЛАНТЫ Аслан
