Ноябры райдайæнæй фæстæмæ аэропорт «Дзæуджыхъæу» раивта куысты зымæгон фæткмæ. Уый тыххæй фехъусын кодта Цæгат Ирыстоны уæлдæфон вагзалы пресс-службæ.
Афтæ, маршрутон хызæджы бæрæггонд сты æрвылбонон балцытæ Мæскуымæ, аэропорттæ «Домодедово» æмæ «Шереметьево»-мæ. Уыдон æххæст кæнынц авиакомпанитæ «Уральские авиалинии», «Победа» æмæ «S7». Уыдонæй уæлдай, авиакомпани «ЮТейр» къуыри æртæ хатты æххæст кæны рейсытæ аэропорт «Внуково»-мæ (æртыццæг, цыппæрæм æмæ сабаты).
Санкт-Петербургмæ балцытæ раздæрау æххæст кæны авиакомпани «Победа» (къуырисæрæй фæстæмæ æрвылбон дæр).
Уыдонæй уæлдай, компани «Уральские авиалинии» бæлццæтты къуыри иу хатт фæхæццæ кæны египетаг курорт Шарм-Эль-Шейхмæ (сабаты), «Победа» та – туркаг Стамбулмæ (къуырисæр, æртыццæг æмæ майрæмбоны).
Пресс-службæйы минæвары ныхасмæ гæсгæ, куысты зымæгон фæтк йæ тыхы уыдзæн 2026 азы 28 мартъийы онг.
Азы райдайæнæй нырмæ аэропорт «Дзæуджыхъæу»-ы лæггæдтæй спайда кодтой 650 мин бæлццонæй фылдæр.
КАЛМАНТЫ Аслан
