Физикон-математикон республикон лицей-интернаты цур æрæджы байгом фæсаууонмæ математикон скъола. Азы райдайæнæй нырмæ уыцы скъолайы ахуырдзаутæ систы минæй фылдæр æвзонг лæппутæ æмæ чызджытæ Цæгат Ирыстоны æппæт районтæй.
Уый тыххæй фехъусын кодта РЦИ-Аланийы ахуырад æмæ наукæйы министр Алыбегты Эллæ.
Министры ныхасмæ гæсгæ, уæлæмхасæн ахуырады ног структурæ байгом кодтой Цæгат Ирыстоны Сæргълæууæг Сергей Меняйлойы амынддзинадмæ гæсгæ.
«Фæсаууонмæ скъолайы ахуырдзаутæ систы 1,3 мин сывæллоны бæрц – 5-, 6– æмæ 7-æм кълæсты ахуырдзаутæ. Уыдон æрмæст горæтæгтæ не сты, фæлæ дæрддзæф хъæуты цæрджытæ дæр. Ахуырты фылдæр хай æххæстгонд цæуы «онлайн» фæткыл. Каникулты рæстæг та ахуыртæ арæзт цæудзысты лицей-интернаты бæстыхайы. Математикæмæ æмхиц чи у, уыцы курдиатджын фæсивæдимæ кусынц лицей-интернаты фæлтæрдджындæр ахуыргæнджытæ, уыцы архайдмæ се ’ргом здахынц æрыгон æмæ хъæппæрисджын специалисттæ дæр. Æппæт фадæттæй дæр архайдзыстæм, цæмæй, математикон ахуырадмæ тырнындзинад чи ’вдисы, уыцы фæсивæдæн уа арфдæр зонындзинæдтæ райсынæн», – загъта министр.
Алыбегты Эллæйы ныхасмæ гæсгæ, фæсаууонмæ скъолайы хъомылгæнинæгтæ ахуыр кæнынц сæрмагонд программæйы бындурыл. Ахуыргæнджытæ сын дæттынц арфдæр математикон æмæ æндæр техникон зонындзинæдтæ, рагагъоммæ сын амонынц профилон уæлдæр ахуыргæнæндæттæм фæлварæнтæ дæттыны фæтк, æмхиц сæ кæнынц наукон-иртасæн куыстмæ æмæ афтæ дарддæр.
КАЛМАНТЫ Аслан
