РЦИ-Аланийы Хицауады премьер-министр ДЗАНАЙТЫ Барис видеоконференцийы бастдзинады фæрцы архайдта, Цæгат Кавказы федералон зылды Уæрæсейы Президенты Æххæстбарджын минæвары хæдивæг Владимир НАДЫКТО цы уæрæх æмбырд сарæзта, уым.
Фембæлды архайджытæ æрдзырдтой бирæ ахсджиаг фарстатыл: адæмы сабыр цардимæ баст УФ-йы Æдасдзинады советы уынаффæтæ æххæст кæныныл, Стратегион хъæппæристы агентады цымыдисагдæр проекттæ царды уадзыныл, креативон экономикæ æмæ амалхъомадон архайды дарддæры райрæзтыл, цæрæнуатон-коммуналон хæдзарад æмæ энергетикæйы куыстуæтты модернизацийыл… Æмбырды архайджытæ сæрмагонд æргом аздæхтой, Цæгат Кавказы федералон зылды дарддæры социалон-экономикон рæзты паддзахадон программæйы уагæвæрдтæ 2025 азы 9 мæймæ куыд æххæстгонд æрцыдысты, уымæ дæр.
Дзанайты Барис йæ раныхасы арфæ ракодта Президенты Цæгаткавказаг минæварады аппарат æмæ Уæрæсейы Экономикон рæзты министрады минæвæрттæн, æппæт сæвзæргæ фарстаты фæдыл республикæйæн зæрдиаг æххуыс кæй кæнынц, регионы ахсджиагдæр проекттыл кæй аудынц, уый тыххæй. Дзанайы-фырты ныхасмæ гæсгæ, республикæйæн вазыгджын сты Цæгат Кавказы федералон зылды дарддæры райрæзты паддзахадон программæйы нысантæ, уыдоны фæрцы хъомысджындæр кæны Цæгат Ирыстоны экономикæ, фадатджындæр кæны йæ социалон къабаз.
Раныхасгæнæг бæстондæр æрлæууыд, энергетикæ æмæ цæрæнуатон-коммуналон хæдзарады комплексы кусæндæтты æнæкъуыхцы экономикон райрæзты фæлварæн программæйыл Цæгат Ирыстон куыд архайы, ууыл.
Йæ ныхасмæ гæсгæ, программæйы уагæвæрдтæ æххæст кæнынæн республикæйæн къæпхæнгай лæвæрд цæуынц сæрмагонд федералон субсидитæ. Уыцы фæрæзты фæрцы цалцæггонд цæуынц коммуналон-энергетикон комплексы объекттæ, фæлхасгæнджыты льготон къордтæн асламдæр слæууынц коммуналон фиддонтæ. Зæгъæм, 2023 æмæ 2024 азты амынд къорды фæлхасгæнджытæн субсидитæн дихгонд æрцыд 1,7 миллиард сомы бæрц, 2025 азы та уыцы субсидиты бæрц суыдзæн 2,4 миллиард сомы.
– Республикæ программæйы кæй архайы, уый фæрцы ахадгæ хуызы цæуы коммуналон-энергетикон инфраструктурæйы рацарæзт, хуыздæр кæны цæрæнуатон-коммуналон лæггæдты хъæд. Ацы къабазы регион цы проекттыл кусы, уыдонæй иу у Алагиры районы хæххон хайы цæрæн бынæтты донуадзæн хызæджы бындурон цалцæг. Уыцы проектмæ гæсгæ, раивдзыстæм хæтæлты 60 километры бæрц, куыстытæн нысангонд æрцыд 650 милуан сомæй фылдæр. Ахæм фæткыл архайд цæуы æндæр проекттыл дæр, – бафиппайдта Дзанайты Барис.
Æмбырды дзуаппон докладтæ скодтой Цæгат Кавказы иннæ регионты минæвæрттæ æмæ профилон федералон ведомствæты разамонджытæ.
Цæгат Ирыстонæй æмбырды архайдтой РЦИ-Аланийы Хицауады Сæрдары хæдивæг Платы Альбинæ æмæ профилон республикон структурæты бæрнон кусджытæ.
РЦИ-Аланийы
Сæргълæууæг
æмæ Хицауады
пресс-службæ
