Нæ республикæйы цæрæнуатон-коммуналон хæдзарады къабазы цы æнæнхъæлæджы уавæртæ сæвзæры, уыдон сбæлвырд æмæ аиуварс кæнынæн иумæйаг системæ, кæнæ оперативон штаб скæнын – ацы фарстайыл журналисттимæ фембæлды рæстæг дзырдта Иумæйаг информацион центры директоры хæстæ рæстæгмæ æххæстгæнæг Салхъазанты Эдуард.
Йæ разныхасы куыд загъта, афтæмæй нырыккон цард домы, цæмæй алцыдæр баст уа цифровизациимæ, уый бæрзонддæр кæны куысты ахадындзинад.
– Уымæ гæсгæ, Цæрæнуатон-коммуналон хæдзарады артаг æмæ энергетикæйы министрады специалисттæ уынаффæ рахастой æмæ бакуыстой сæрмагонд программæйыл. Йæ сæйраг нысан у цæрджыты удæнцойад. Зæгъæм, кæмдæр электрон рухсытæ ахуыссыдысты, кæнæ уазал дон нæ кæлы æмæ æндæр ахæм къуылымпытæ æрцыд, уæд кæдæм, кæмæ дзургæ у? Адæм сагъæсы бацæуынц. Ныр уавæр аивдзæн. Æппæт фарстаты тыххæй, цыфæнды афон дæр лæвар бадзурæн уы-
дзæн иу номырмæ. Æнæмæнг, дзуапп райсдзыстут.
Проект цæудзæн æртæ къæпхæнæй. Фыццаг – сæвзæргæ уавæры тыххæй хъусынгæнинæгтæ сбæлвырд кæнын æмæ сæ дзуапдæттæн куыстуæттæм адæттыны системæ бацæттæ кæнын. Дыккаг – цæрджыты курдиæттыл чи кусдзæн, ахæм иумæ-
йаг республикон колл-центр саразын.
Авари кæм æрцыдис, йæ ахсджиагдзинад, чи йыл дзуапп дæтты æмæ йæ аиуварс кæныны рæстæг – ацы æмæ æндæр бæстон информаци кæм уыдзæн, ахæм картæ саразын та у æртыккаг къæпхæн. Программæ афтæ арæзт у, æмæ ацы уæлæмхасæн фæрæз Ирыстоны цæрджытæн фадат ратдзæнис, цæрæнуатон-коммуналон къабазы цы аваритæ æрцæуа, уыдоны тыххæй фехъусын кæнынæн. Уыцы-иу рæстæг цæстдард уыдзæн алы æрцæугæ аваримæ æмæ службæты архайдмæ дæр, – зæгъы Эдуард.
Салхъазанты Эдуард дзыллон хабархæссæг фæрæзты минæвæрттæн экраныл равдыста, фидæны программæ куыд парахатæй кусдзæн, стæй йæ ахадындзинад цас уыдзæн, уый.
Куыд загъта, афтæмæй системæ æппæт хъарутæй, къæпхæнгай æркусдзæн ног азы кæронмæ.
– Æнæнхъæлæджы уавæр куы ‘рцæуы, уæд сæйрагдæр у адæмы æдасдзинад æмæ хæрзвадатæн уавæртæ скæнын цыбыр рæстæгмæ. Æмæ ам ахсджиаг у æппæт куыстуæтты æмгуыстад. Цæрджытæн се хæс у махмæ æрбадзурын, сæ фарста кæнæ курдиат афойнадыл конд куы æрцæуа, уæд сæм æууæнкдзинад фæзындзæн республикæйы разамындмæ, – загъта директоры хæстæ рæстæгмæ æххæстгæнæг.
Пресс-конференцийы ма дзырдтой æндæр фарстатыл дæр.
Гугкаты Жаннæ,
къам систа
Татьянæ Шеходанова
