Æппæт Уæрæсейы дæр 9 декабрь у зæрдылдарæн бон – цалдæр æнусы чи иу кæны, Георгийы кавалертæй райдай æмæ ныры дуджы Хъæбатыртæй фæу. Ацы бæрæгбон фæзынд ссæдз азы размæ, фæлæ уæдæй нырмæ ссис ахсджиаг мадзал, хъæбатырдзинад æмæ Фыдыбæстæмæ уарзондзинады æвдисæн.
Фыдыбæстæйы Хъæбатырты боны кадæн Дзæу-джыхъæуы Намысы аллейы Советон Æфсады инæлар Плиты Иссæйы ингæны уæлхъус арæзт æрцыд героикон-патриотон акци «Равнение на Героев». Бацæттæ йæ кодтой РЦИ-Аланийы Национ политикæ æмæ æддагон бастдзинæдты министрад, Цæгат Ирыстоны æфсæддон-историон æхсæнад, Адæмты хæлардзинады республикон хæдзар, Дзæуджыхъæуы бынæттон хиуынаффæйад æмæ Æхсæнадон совет. Архайдтой дзы Афганистаны, Абхазы республикæйы æмæ æндæр локалон хæстыты ветерантæ, Дзæуджыхъæуы кадетон кълæсты ахуырдзаутæ, æхсæнадон организациты минæвæрттæ.
Азæлыдысты Уæрæсейы Федераци æмæ РЦИ-Аланийы гимнтæ. Бæрæгбоны архайджытæн арфæ ракодта Æхсæнадон советы нымæрдар, РЦИ-Аланийы Национ политикæ æмæ æддаг бастдзинæдты министры уынаффæгæнæг, Адæмты хæлардзинады республикон хæдзары директоры хæдивæг Хъайтыхъты Тамарæ. Дарддæр ныхасы бар лæвæрд æрцыд РЦИ-Аланийы Ветеранты советы кадджын сæрдар, отставкæйы инæлар-майор Къаболаты Солтанæн.
– Нæ зынаргъ æмбæлттæ! Абон, Фыдыбæстæйы Хъæбатырты бон, мах æрбамбырд стæм Æфсады инæлар Плиты Иссæйы цыртдзæвæны цурмæ. Уый хуымæтæджы нæу. Иссæ уыд Советон Цæдисы дыууæ хатты Хъæбатыр æмæ Манголы Республикæйы Хъæбатыр дæр. Æз мæхæдæг цалдæр хатты ныхас кодтон Советон Цæдисы маршæл Дмит-рий Язовимæ. Уый стыр аргъ кодта Плиты Иссæйæн, æдзух ын дзырдта йе сгуыхтдзинæдты тыххæй. Хъуамæ рæзгæ фæлтæр зоной Ирыстоны Хъæбатырты нæмттæ, цы сгуыхт-дзинæдтæ сарæзтой, уый. Фæсивæдæн мæ зæрдæ зæгъы, дуне сабыр куыд уа, Фыдыбæстæ бахъахъхъæныны хъару сæм куыд уа, уый.
Дарддæр ма арфæ ракодтой æмæ раныхас кодтой арæнтæ хъахъхъæнæг æфсады инæлар, Адæмты хæлардзинады республикон хæдзары директор Александр Охотников, Дзæуджыхъæуы бынæттон хиуынаффæйады сæрдары хæдивæг Маматы Хъазыбег, Афганистаны хæсты ветеранты советы сæрдар Пхалæгаты Сергей æмæ иннæтæ.
Ахæм мадзæлттæ ахъаз сты рæзгæ фæлтæры патриотон хъомыладæн. Фыдыбæстæйы Хъæбатырты бон традицион æгъдауæй баиу кодта Екатеринæйы заманы хæстонты сгуыхтдзинæдтæ æмæ ныры Уæрæсейы хæдбар-дзинад æмæ национ интерестæ хъахъхъæнджыты.
ХЪОЙБАЙТЫ Галинæ, къам систа
Татьянæ Шеходанова
