РЦИ-Аланийы Хицауады Сæрдар Дзанайты Барис цы æмбырд сарæзта, уым ныхас рауад регионы инвестицион хъомыс ахадгæдæр кæныны фарстатыл. Фембæлды архайджытæ сæрмагонд æргом аздæхтой, Цæгат Ирыстоны инвестицион совет хорзыл цы проекттæ банымадта, уыдон æххæст кæныныл куыст куыд цæуы, уымæ.
Ныхасы архайæг уыдысты министрадтæ æмæ æндæр профилон ведомс-
твæты разамонджытæ, районты сæргълæуджытæ, стæй, амынд инвестицион проекттыл чи кусы, уыцы компаниты минæвæрттæ.
Æмбырды райдайæны Дзанайты Барис куыд фæбæрæг кодта, афтæмæй республикæ ахадгæ куыст кæны егъау инвесторты æргом регионмæ раздахыны, ног кусæн бынæттæ байгом кæныны хъуыддаджы. Хицауады Сæрдары ныхасмæ гæсгæ, уыцы фарстатыл архайгæйæ, сæйрагдæр у, цæмæй хицаудзинады æххæстгæнæг оргæнтæ иудадзыг æппæтвæрсыг æххуыс кæной инвестортæн.
– Фæстаг азты дæргъы бирæ ахсджиаг проекттыл бакуыстам иумæйаг хъарутæй. Кæй зæгъын æй хъæуы, уыцы проекттæй алкæмæндæр йæхи нысаниуæг æмæ ахадындзинад ис, фæлæ сæ иу кæны ахæм æууæл – махæн бантыст бирæ ног кусæн бынæттæ байгом кæнын æмæ рес-
публикæйы бюджеты æфтиагджын хайыл бафтауын, – бафиппайдта Дзанайы-фырт.
Æмбырды сæйраг доклад скодта республикæйы экономикон рæзты министр Сокаты Марат. Министры ныхасмæ гæсгæ, ацы аз инвестортæ кусын райдыдтой 8 егъау проектыл. Уыцы куыстуæттæ саразынæн дихгонд æрцыд зæххы 11 хайы. Куыд нысангонд цæуы, афтæмæй уыцы проектты хуызы республикæйы уæлæмхасæн байгом уыдзæн 800 кусæн ног бынаты. Инвестортæ къæпхæнгай бавнæлдтой нысангонд куыстытæм.
Сокаты Марат дарддæр куыд радзырдта, афтæмæй РЦИ-Аланийы инвестицион совет кусын райдыдта 2021 азы. Уæдæй нырмæ ацы структурæ цардмæ фæндаг радта бирæ ахсджиаг инвестицион проекттæн. Уæдæй абонмæ уыцы проектты фæрцы цы куыстуæттæ байгом, уыдон республикæйы бюджетмæ алыхуызон хъалонтæ æмæ æндæр фиддонты фæрцы барвыстой 700 милуан сомæй фылдæр, сæ кусджыты нымæц та 3,2 минæй фæфылдæр.
Дарддæр æмбырды раныхас кодтой инвестицион компаниты минæвæрттæ. Уыдон бæстон æрлæууыдысты нысангонд арæзтадон куыстыты фæткыл.
Фембæлдæн хатдзæгтæ кæнгæйæ, Дзанайты Барис профилон ведомствæты минæвæрттæн бацамыдта, цæмæй инвестортимæ иумæ æркæсой, нысангонд проектты фæдыл куыст куыд цæуы, уымæ. «Æмæ кæд исты къуыхцытæ разына амынд проекттыл куысты, уæд æвæстиат мадзæлттæ саразын хъæуы сæ аиуварс кæнынæн. Проектты автортæн æппæтвæрсыг æххуыс уыдзæн профилон республикон ве-
домствæты ‘рдыгæй. Уыимæ, инвестортæ дæр афойнадыл хъуамæ æххæст кæной сæхимæ райст хæстæ», – загъта Хицауады Сæрдар.
РЦИ-Аланийы
Сæргълæууæг æмæ
Хицауады
пресс-службæ
