Знон, куыд иннæ регионты, афтæ Цæгат Ирыстоны дæр райдыдта æппæтуæрæсеон хæрзаудæн акци «Фæндæтты назбæлас». Ногазон акцийы фыццаг архайджытæ систы РЦИ-Аланийы Сæргълæууæг Сергей МЕНЯЙЛО æмæ республикæйы хицаудзинады закъонæвæрæг æмæ æххæстгæнæг оргæнты иннæ бæрнон кусджытæ.
Бæрæгбоны назбæласæй сывæллæтты фæндæттимæ цалдæр шары рафтаугæйæ, Сергей Меняйло куыд фæбæрæг кодта, афтæмæй ацы хæрзаудæн мадзалы æрвылаз архайынц бирæ адæм. Уыдонæн уæлдай ахсджиаг свæййы рæзгæ фæлтæры зæрдæтæ Ног азы къæсæрыл барухс кæнын.
Афтæ, республикæйы Сæргълæууæг сæххæст кæндзæн Запорожьейы облæсты горæт Мелитополы æвзонг цæрæг Алексей æмæ ирыстойнаг чызг Аланæйы курдиæттæ – фæнды сæ Мæскуымæ абалц кæнын, Дзæуджыхъæуы цæрджытæ Илонæ æмæ Астанæн та балæвар кæндзæн музыкалон колонкæ æмæ компьютерон хъазæн.
Сывæллæтты курдиæттæ сæххæст кæндзысты акцийы иннæ архайджытæ дæр.
Зындгонд куыд у, афтæмæй амынд акци æрвылаз арæзт цæуы Президент
Владимир Путины хъæппæрисæй. 2018 азæй нырмæ акцийы архайджытæ сæххæст кодтой æппæт Уæрæсейы регионтæй 300 мин сывæллоны фæндæттæ.
Дмитрий АСТАХОВ, къам систа
Татьянæ ШЕХОДАНОВА
