«Роспотребнадзор»-ы цæгатирыстойнаг управленийы специалистты фæрцы республикæйы фæлхасгæнджытæн цауд товартæ æмæ лæггæдты тыххæй æбæрнон уæйгæнджытæ æмæ æндæр къабæзты кусджытæ фæстæмæ раздæхтой 30 милуан сомæй фылдæр.
Регионалон управленийы куыд фехъусын кодтой, афтæмæй 2025 азы 9 мæймæ фæлхасгæнджыты барты фæдыл хайадмæ республикæйы цæрджытæ балæвæрдтой 600 хъастæй фылдæр (фароны уыцы æмгъуыдимæ абаргæйæ, 40 проценты фылдæр). Уыимæ, ведомствæйы специалисттæ фæлхасгæнджытæн телефонæй радтой 900 консультацийæ фылдæр.
– Кæй зæгъын æй хъæуы, алкæцы курдиаты фæдыл дæр арæзт æрцыд цæстдарæн архайд. Рагагъоммæ къæпхæныл (ома, тæрхондонмæ нæ бацæугæйæ) къухы бафтыд цауд товартæ æмæ лæггæдты ныхмæ фæлхасгæнджытæн фæстæмæ 900 мин сомæй фылдæр раздахын. Кæцыдæр хъуыддæгты фæдыл курдиæттæ тæрхондонмæ бадæттын бахъуыд. Афтæмæй тæрхондоны уынаффæйæ фæлхасгæнджытæн фæстæмæ радтой 30 милуан сомæй фылдæр, – радзырдта фæлхасгæнджыты барты фæдыл хайады разамонæг Плиты Аннæ.
Управленийы минæвары ныхасмæ гæсгæ, хъæстытæн сæ 56 проценты баст сты базарады къабазы æгъдаухæлдтытимæ, 44 проценты та – цауд лæггæдтимæ.
Калманты Аслан
