РЦИ-Аланийы Хицауады Сæрдар Дзанайты Барисы разамындæй уыд Фæндаггон змæлды æдасдзинады фарстаты фæдыл республикон къамисы радон æмбырд. Фембæлды архайджытæ се ‘ргом аздæхтой фæндаггон фæтк бæстондæр æмæ æдасдæр кæныны уæлæмхасæн мадзæлттæм.
Æмбырды архайджытæ сæрмагондæй æрдзырдтой, бæлццæттæласæн куыст чи кæны, уыцы юридикон организацитæ æмæ хицæн амалхъомты архайд банывыл кæныны фарстайыл. Уый тыххæй сæйраг доклад скодта Паддзахадон автомобилон инспекцийы цæгатирыстойнаг управленийы хицау Александр Шалагин. Управленийы разамонæджы ныхасмæ гæсгæ, транспортон компаниты архайдмæ цæст даргæйæ, азы райдайæнæй нырмæ фæндаггон инспектортæ рабæрæг кодтой 3 мин алыхуызон административон æгъдаухалдæй фылдæр. Цæстдарæн мадзæлтты фæстиуæгæн административон æфхæрд баййæфтой 68 юридикон иуæг æмæ 84 бæрнон кусæджы. Ахæм контролон-цæстдарæн мадзæлттæ иудадзыгон фæткы бындурыл арæзт цæуынц республикæйы æппæт районты дæр.
Фарстайыл ныхас баххæст кодта Цæгат Ирыстоны Транспорты комитеты сæрдар Захъаты Алан. Уый куыд фæбæрæг кодта, афтæмæй бæлццæттæласæн транспорты куыстмæ цæстдарæн мадзæлттæ комитет æххæст кæны Паддзахадон автоинспекци, «Роспотребнадзор» æмæ æндæр ведомствотимæ æнгом æмархайды фæрцы.
Профилон ведомствæты разамонджыты докладтæн хатдзæгтæ кæнгæйæ,
Дзанайты Барис «Ространснадзор» æмæ РЦИ-Аланийы Транспорты комитеты минæвæрттæн бафæдзæхста, цæмæй бæлццæттæласæн транспорты архайдмæ уа бæстондæр цæстдард, уыимæ, сæйрагдæр æргом аздахын хъæуы алыхуызон æгъдаухæлдтыты профилактикæмæ.
– Республикæйы цæрджыты æдасдзинадæн зæрдæзæгъгæ фадæттæ аразын нæ иумæйаг хæс у. Æппæт фадæттæй дæр кусын хъæуы, цæмæй закъонæвæрынадон-нормативон домæнтæ æнаиппæй æххæстгонд цæуой. Уæлдай вазыгджын у, цæмæй алкæцы бæлццон дæр йæхи æдас æнкъара, йæ фæндагæй райгонд уа. Республикæйы Сæргълæууæг Сергей Меняйлойы хъæппæрисæй æххæстгонд цæуы транспортон реформæйы программæ. Уый фæрцы æлхæд цæуы бæлццæттæласæн ног транспорт, æндæр ногдзинæдтæ хаст цæуынц транспортон компаниты архайдмæ. Вазыгджын у, цæмæй æппæт уыцы мадзæлттæ хорзæрдæм ахадой къабазы куыстыл, – бафиппайдта Дзанайты Барис.
2025 азы куыстæн хатдзæгтæ скæнгæйæ, къамисы уæнгтæ æрдзырдтой фидæн азы куысты пълантыл.
РЦИ-Аланийы
Сæргълæууæг
æмæ Хицауады
пресс-службæ
