2025-2027 азты Цæгат Ирыстоны æххæстгонд цæудзæн фæзуæтты комплексон райрæзты программæ. Уый фæлгæты республикæйы арæзт æрцæудзæн цæрæнуæтты 78 мин квадратон метры бæрц.
Уый тыххæй йæ телеграм-каналы фехъусын кодта РЦИ-Аланийы Хицауады Сæрдары фыццаг хæдивæг Отарты Георги.
Вице-премьеры хъусынгæнинагмæ гæсгæ, амынд æмæ æндæр программæтæ æххæст кæныныл æрæджы ныхас уыд Уæрæсейы арæзтады министры фыццаг хæдивæг Александр Ломакинимæ. Бæлвырдæй æркастæуыд регионы проекттæн федералон æфстæуттæ дих кæныны фарстамæ.
Республикæйы минæвæрттæ федералон чиновникæн радзырдтой, Ногиры хъæуы фарсмæ зæххытыл цы комплексон райрæзты программæ æххæстгонд æрцæу-
дзæн, уый тыххæй. Зындгонд куыд у, афтæмæй уым ног микрорайон сараздзысты сæрмагонд æфсæддон операцийы ветерантæ æмæ адæмы æндæр льготон къордты минæвæрттæн. Федералон министрады ахæм проекттæ хорзыл банымадтой.
Фембæлды архайдта Цæгат Ирыстоны арæзтад æмæ архитектурæйы министр Бетанты Марат дæр.
Нæ уацхæссæг
