Паддзахадон автомобилон инспекцийы кусджытæ цы профилактикон мадзæлттæ аразынц, уыдонæй иу ацы бонты уыд Æрыдоны. Фæндаггон инспектортæ фæсивæды минæвæрттимæ сарæзтой акци «Æвронг шофыр».
Уый тыххæй фехъусын кодта Паддзахадон автомобилон инспекцийы цæгатирыстойнаг управленийы пресс-службæ.
ГАИ-йы инспектортæ æмæ Фæсивæды социализацийы центры бархионтæ фæндаггон адæмы урæдтой æмæ сын сæ зæрдыл лæууын кодтой, карз нозт æхсæнады цардæн цы бирæ знаггад хæссы, нозтджын шофыр та уæлдай тасдзинад кæй хæссы бæлццон адæмæн, æппæт уыцы хабæрттæ. Уымæй уæлдай, акцийы архайджытæ хæдтулгæты хицæуттæн уæрстой, нозтджын шофырты аххосæй цы транспортон фыдбылызтæ æрцыд, амынд æгъдаухæлды тыххæй цавæр административон кæнæ уголовон бæрнондзинад сæмбæлдзæн фыдгæнæгыл, æппæт ахæм информациимæ буклеттæ.
Фæндаггон службæйы минæвæртты хатдзæгмæ гæсгæ, ногазон бæрæгбæттæ æмæ сæ агъоммæ зынгæ фæфылдæр вæййы, хæдтулгæйы рулыл нозтджынæй чи бабады, ахæм шофырты нымæц. Уыдонæй æрбайрох вæййы, ахæм уавæры фæндаггон змæлды архайджыты æдасдзинад къахыргонд кæй цæуы, сæ цардæн дæр уæлдай тасдзинад кæй фæзыны, уый.
Паддзахадон автомобилон инспекцийы минæвары ныхасмæ гæсгæ, шофыр нозтджынæй урæд куы ’рцæуа, уæд административон ивар бафиддзæн 45 мин сомы бæрцæй. Уымæй уæлдай, 1,5-2 азы æмгъуыдмæ йæ шофыры бартæ ист æрцæудзысты.
Æмæ ма ахæм нымæцтæ. Фæстаг къуырийы дæргъы автоинспектортæ рабæрæг кодтой фæндаггон змæлды фæтк фехалыны 19,5 мин цауы бæрц. Уыдонæй 72 цауы баст уыдысты нозтджынæй хæдтулгæйы рулыл бабадынимæ, 54 адæймагмæ та шофыры бартæ нæ уыд (кæнæ та сын сæ тæрхондоны уынаффæйæ раздæр байстой). Кæй зæгъын æй хъæуы, ахъуыдыйаг æмæ сагъæссаг нымæцтæ…
Дмитрий АСТАХОВ
