Дзæуджыхъæуы Къомайты Русланы номыл Космонавтикæйы скъолайы музей ссис Мæскуыйы Уæлахизы музейы æмархайæг æмæ йæ бахастой дардæмгъуыдон программæ «Уæлахизы скъолайы музей»-мæ.
Ныридæгæн нæ республикæйы ис Уæлахизы музейы программæйы фондз архайæджы.
– Ныр скъолаты педагогтæн уыдзæн бæстæйы сæйраг æфсæддон-историон музейы авналæнтæй пайда кæнын, фæсивæдæн та – Уæлахизы музейы онлайн- æмæ офлайн-дзыллон мадзæлтты (зæ-гъæм, нывты конкурстæ «Уæлахизы Назбæласы ныв скæн»-ы, «Фыдыбæстæ хъахъхъæнджытæ»-йы, «Уæлахизы фыстæг»-ы, стæй флешмобтæ «Ныфсы цæхæр»-ы, «Номарæн мыдадзын цырагъ» æмæ «Уæрæсейы тырысайы хуызтæ»-йы) архайыны фадат. Скъолатæн хæссæм Рæстаг кинойы дунеон фестивалы фæзтæ суæвыны, стæй проекттæ «Уæлахизы хъæлæстæ» æмæ «Уæлахизы цæсгæмттæ»-имæ баиу уæвыны фæндон, – загъта Уæлахизы музейы минæвар.
Фарон апрелæй фæстæмæ чи цыд, курдиæттæ исыны уыцы нудæсæм хайы рæстæг 55 уæрæсейаг регионы, стæй Белоруссийы, Приднестровьейы Молдаваг Республикæйы, Хуссар Ирыстоны, Турчы, Австрали æмæ Уæрæсейы фæсарæйнаг минæварæдты скъолаты 256 музейы баиу сты Уæлахизы музейимæ. Ныр проект иу кæны 89 уæрæсейаг регионы æмæ æвддæс фæсарæйнаг бæстæйы 2806 скъолайы музейтæ.
Программæйы зæрдиагæй архайынц канд скъолаты нæ, фæлæ рæвдауæндæтты музейтæ дæр. Музейты æфснайд сты регионты цардимæ баст экспонаттæ. Фарон проекты архайдтой æхсæз мин скъоладзауæй фылдæр. Зæгъæм, 27 уæрæсейаг регионы æмæ Белоруссийы скъолаты музейтæ кæй сарæзтой, уыцы æртындæс историон-культурон равдысты æвæрд æрцыдысты Уæлахизы музейы фæзыл.
Æвзонг активисттæ хæсты архайджытæ æмæ фæсчъылдымы фæллойгæнджыты тыххæй æрæмбырд кодтой 3,7 мин æрмæгæй фылдæр æмæ сæ барвыстой æппæтадæмон историон проект «Уæлахизы цæсгæмттæ»-мæ. Уæлахизы юбилейы кадæн Мæскуыйы Поклоны хохыл кæй байгом кодтой, проект «Уæлахизы хъæлæстæ»-йы архайæг фæсивæд уыцы парахат мультимедион экспозицийæн бакастысты хæсты архайджыты 5 мин фыстæгæй фылдæр æмæ сæ ныффыстой диктофоныл. «Уæлахизы скъолайы музей»-ы дзыллон мадзæлттæ ацыдысты мæскуыйаг скъолаты æмæ историон регионты Уæлахизы музейы сывæллæтты центрты дæр. Уымæй уæлдай, проект «Сывæллæттæ – сывæллæттæн»-ы архайæг æвзонг экскурсиамонджытæ се ’мгæрттæн Уæлахизы музейы экспозициты сарæзтой 2,5 мин экскурсийæ фылдæр.
Бæстæйы алы ахуыргæнæндоны музеймæ дæр ис программæ «Уæлахизы скъолайы музей»-ы архайын æмæ Уæлахизы музейы æмархайæг суæвыны бар. Ацы
хъуыддаг сæххæст кæнынæн адæймаджы хæс у нысантæ анкетæйы сæвæрын, науæд та музейы тыххæй бæрæггæнæнтæ электронон пост sertifikatpobedy@cmvov.ru/-мæ барвитын. Программæйы тыххæй бæлвырддæр хабæрттæ фыст сты сайт https://schoolvictorymuseum.ru-йы.
Наталья Катрич
