2026 азы бындурон цалцæггонд æрцæудзæн Мæздæ-джы А.С. Пушкины номыл чиныгдон. Культурæйы ацы артдзæсты модернизацийæн фадæттæ фæзынд фыццаг-радон национ проект «Бинонтæ»-йы фæрцы.
Пушкины номыл горæтаг чиныгдон мæздæггæгты ’хсæн кадджын у – йæ иудадзыгон кæсджытæ 2 мины бæрц сты. Уыдонæй уæлдай, чиныгдоны лæггæдтæй æхсызгонæй пайда кæнынц, горæты бæстастæу чи æрбынæттон, уыцы скъолаты, интернатты, æндæр кусæндæттæ æмæ организациты минæвæрттæ дæр. Чиныгдоны кусджытæ мæздæггæгты арæх æрбахонынц чингуыты презентацитæм, семинартæм, лекторитæм, æндæр культурон-рухста-уæн фембæлдтытæм.
Фæлæ фæстаг рæстæг культурæйы ацы артдзæсты куыст иуцасдæр къуылымпы кæны, агъуысты техникон уавæр нырыккон домæнты аккаг кæй нал у, уыцы æууæл. 2024 азы Мæздæджы районы администраци йæхи хъаруты фæрцы чиныгдоны
бæстыхай уæлæнгай сцалцæг кодта, иуцасдæр ын фæхуыздæр кодта йæ уавæр. Фæлæ чиныгдоны агъуыст домы бындурон цалцæг.
Фарстамæ бæстон æркæсгæйæ, районы администраци æмæ профилон республикон ведомствæтæ чиныгдоны бындурон цалцæджы тыххæй хъæугæ гæххæттытæ фарон арвыстой Уæрæсейы Культурæйы министрадмæ. Æмæ хъуыддаг фæрæстмæ: мæздæггаг чиныгдоны бындурон цалцæг бахастой 2026 азы пъланмæ, фæрæзтæ та йын радих кæндзысты национ проект «Бинонтæ»-йы фæлгæты.
Ныр мæздæггæгтæ æнхъæлмæ кæсдзысты нысангонд куыстытæм. Проекты автортæ сын зæрдæ бавæрдтой, бындурон рацарæзты фæстæ сæ уарзон чиныгдон ногæй йæ хуыз кæй скалдзæн, уымæй. Нысан æвæрд цæуы, цæмæй Пушкины номыл чиныгдон суа, раззагдæр нымæцон кусæнгæрзтæй ифтонг чи уыдзæн, ахæм нырыккон культурон фæзуат.
КАЛМАНТЫ Аслан
