Сергей МЕНЯЙЛО хуыздæр журналистон куысты тыххæй РЦИ-Аланийы Сæргълæууæджы æрвылазон премийæ схорзæхджын кодта нæ республикæйы радио, телеуынынад, мыхуыры фæрæзтæ æмæ интернеты тыгъдады кусæг журналистты. Кадджын мадзал Уæрæсейы мыхуыры боны фæлгæты ацыд республикон Национ музейы.
Сергей Меняйло арфæ ракодта медиа тыгъдады архайджытæн, нæ республикæйы цæрджытæм хæрзхъæд æмæ ахсджиаг информаци афойнадыл кæй хæццæ кæнынц, регионы рæзты кæй архайынц, уый фæдыл. Уæлдайдæр фæбæрæг кодта журналистты æмархайд паддзахадон хицаудзинады оргæнтимæ.
– Зæрдиагæй арфæ кæнын уе ’ппæтæн дæр уæ профессионалон бæрæгбоны фæдыл. Абон сымахæй бирæ аразгæ у! Сымах махæн, Хицауады уæнгтæн, нæ размæцыды тых стут, нæ республикæ хуыздæр æмæ æппæтфадатджындæр цæмæй уа, уыцы хъуыддаджы нæ размæцыды тых. Уымæ гæсгæ ма уын иу хатт зæрдиагæй арфæ кæнын уæ æрвылбоны æнæнцой куыст, уæ рæстдзинад æмæ цымыдисдзинады, нæ
республикæйы цæрджыты чи тыхсын кæны, ахæм алыхуызон фарстатæ лыг кæныны
хъуыддаджы баххуыс кæнынмæ цæттæ кæй стут, æмæ æхсæнадæн пайда æрхæссыны фæндоны тыххæй, – загъта республикæйы разамонæг.
Сергей Меняйло ныхас кодта дзыллон хабархæссæг фæрæзты минæвæрттимæ, дзуаппытæ ратта журналисттæ æмæ блогерты фæрстытæн.
Махæн, газет «Рæстдзинад»-ы редакцийы коллективæн, уæлдай æхсызгондæр у, республикæйы Сæргълæууæджы æрвылазон премийæ хорзæхджын чи æрцыд, уыдоны ’хсæн не ’мкусæг, зындгонд поэт, Уæрæсейы Фысджыты цæдисы æмæ Уæрæсейы Журналистты цæдисы уæнг, РЦИ-Аланийы культурæйы сгуыхт кусæг æмæ нæ хорз хæлар Касаты Батрадз дæр кæй ис, уый. Батрадз, зæр-диагæй дын арфæ кæнæм! Сфæлдыстадон удцырынæй ма бирæ азты хайджын куыд уай, ахæм арфæ дын дунейы фарн балæвар кæнæд!
Ноджы ма республикæйы Сæргълæууæджы æрвыл-азон премийæ хорзæхджын æрцыдысты журналисттæ: Тедеты Иринæ æмæ Къостанты Давид («15-æм регион»), Газайты Иринæ, Хетæгкаты Зæлинæ, Моргуаты Ладæ, Таматы Карина (телеуынынад «Иристон-TV») æмæ иннæтæ.
ГТРК «Алания»-йы директор, РЦИ-Аланийы Парламенты уæнг, республикæйы Журналистты цæдисы сæрдар Хъуысаты Тимур йæ киноныв «Ирыстоны намыс»-ы тыххæй цы æхцайы премийæ хорзæхджын æрцыд, уый ратта сæрмагонд æфсæддон операцийы архайджытæн æххуысгæнæг, Адæмон фронты минæвæрттæм.
ХЪОЙБАЙТЫ Галинæ, къам систа
Татьянæ Шеходанова
