Зындгонд куыд у, афтæмæй 2023 азы РЦИ-Аланийы Сæргълæууæг Сергей МЕНЯЙЛО æмæ Запорожьейы облæсты губернатор Евгений БАЛИЦКИЙ бафыстой дыууæ регионы ’хсæн æмгуыстады бадзырд. Уый уагæвæрды бындурыл Цæгат Ирыстон йæхимæ райста облæсты Черниговкæйы районыл æппæтвæрсыг æмцегады хæс.
Уæдæй нырмæ цæгатирыстойнаг министрадтæ æмæ ведомствæтæ, стæй хицæн организацитæ рапарахат кодтой уæрæх æмгуыстад Черниговкæйы районимæ – архайынц арæзтадон-цалцæггæнæн проектты, стæй муниципалитеты царды дарддæры нывылады иннæ мадзæлтты.
Уыцы куысты зæрдиагæй чи архайы, ахæм ведомствæтæй иу у РЦИ-Аланийы Æрдзон фæрæзтæ æмæ экологийы министрад. Уый бæрнон кусджытæ æмæ дæлбар организацитæ дарддæр дæр æххуыс кæндзысты Черниговкæйы районæн. Æрдзон фæрæзтæ æмæ экологийы министр Бæззаты Вадимы ныхасмæ гæсгæ, запорожьейæгтимæ æмархайд, фыццаджы-фыццагдæр, цæудзæн экологи æмæ адæймаджы царды фæрныгады къабазы.
«Ныртæккæ Черниговкæйы районы бынæттон хиуынаффæйады
администрацийы минæвæрттимæ кусæм 2026 азæн æрдзхъахъхъæнæн-экологон мадзæлтты пъланыл. Уыдон æххæстгонд цæудзысты фыццаградон национ проект «Экологон фæрныгад»-ы фæткы бындурыл. Зæгъæм, адарддæр кæндзыстæм районы хъæды фæрæзтæ хъахъхъæныныл æмархайд, нæ специалисттæ запорожьейæгтæн бакæндзысты алывæрсыг консультацион-методикон æххуыс, – радзырдта министр. – Фарон уал районмæ арвыстам алыхуызон бæлæсты 1 мин талайы. Ахæм фæткыл дарддæр райрæздзæн Черниговкæимæ не ’ппæтвæрсыг æмгуыстад».
Нæ уацхæссæг
