Дзæуджыхъæуы дарддæры райрæзты генералон пъланы проект хæстæгдæр рæстæг рахæсдзысты адæмы рæгъмæ. Уый тыххæй фехъусын кодта Цæгат Ирыстоны сæйраг горæты администрацийы пресс-службæ.
Зындгонд куыд у, афтæмæй фарон Дзæуджыхъæуы райрæзты генералон пъланы проект саразын бахæс кодтой наукон-иртасæн институт «Земля и город»-æн (Нижний Новгородæй).
Генералон пъланы рагагъоммæ проект æвдыст æрцыд, фæззæджы горæты администрацийы цы уæрæх æмбырд сарæзтæуыд, уым. Уæд архитектортæ æмæ иннæ специалисттæ фæндæттæ æмæ фиппаинæгтæ бахастой проектмæ. Ныр проект аразджытæ уыцы фиппаинæгтæ бахыгътой æмæ æркæсынмæ сæрвыстой ног документ. Ног проектыл ныр ныхас цæуы профилон республикон æмæ горæтаг ведомствæты.
Уыдоны специалистты бафтауинæгтæ бамбырд кæндзæн горæты администраци. Куыд нысангонд цæуы, афтæмæй хæстæгдæр рæстæг горæты архитектурæйы управлени ног фембæлд сараздзæн ведомствæты минæвæрттимæ генералон пъланы кæронбæттæн проект сфидар кæныны нысанимæ.
«Специалисттæ æмæ иннæ эксперттæ иу хъуыдымæ куы ‘рцæуой, проекты сæйраг уагæвæрдтыл куы сразы уой, уæд документ мыхуыргонд æрцæудзæн горæты администрацийы сайты. Уый фæрцы дзæуджыхъæуккæгтæй алкæмæн дæр уыдзæн генералон пъланы проектимæ базонгæ уæвыны фадат. Уыимæ, уыцы къæпхæныл дæр иуæй-иу ивддзинæдтæ бахæссæн уыдзæн документмæ. Нæ зæрдæ дарæм, горæты цæрджытæ уыцы фарстамæ зæрдиаг æргом кæй аздахдзысты, ууыл», – бафиппайдта архитектурæйы управленийы разамонæджы хæдивæг Хъуысаты Сослан.
Администрацийы минæвары ныхасмæ гæсгæ, ахæм фиппаинæгтæ æмæ бафтауинæгтæ бахæссæн уыдзæн дыууæ мæйы æмгъуыдмæ.
Дмитрий Астахов
