Цæгат Ирыстоны эпидемиологион уавæр у нывыл. Карз хæцгæ низты (ОРВИ-йы) парахат афæдзы ацы афонмæ гæсгæ у æмбæлгæ уавæрыл – эпидемиологион æмвæзадæй 1,6 проценты ныллæгдæр. Рынчынтæн сæ 70 проценты сты сывæллæттæ.
Уымæй уæлдай, фæстаг авд бонмæ сбæрæг ковидæй фæрынчыны авд цауы. Ивгъуыд къуыриимæ абаргæйæ, карз хæцгæ низтæй чи фæрынчын, уыдоны нымæц фæстаг къуыри иуцасдæр фæфылдæр. Ахуыргæнæндæтты дарддæр дар каст цæуы, низтæй бахъахъхъæныны санитарон домæнтæ алы райсом дæр куыд æххæстгонд цæуынц, уымæ.
«Роспотребнадзор»-ы амындмæ гæсгæ, сывæллæтты 20 проценты рынчын куы уой, уæд скъолатæ кæнæ рæвдауæндæттæ хъуамæ цæуой æхгæд. Уый фæрцы низы парахатæн ис бауромæн.
– Ныййарджытæн сæ зæрдыл лæууын кæнæм, сывæллонмæ низы бæрæггæнæнтæй гыццылдæр исты фæзынд, зæгъгæ, уæд ын рæвдауæндон кæнæ скъоламæ æрвитæн нæй. Сæхæдæг дæр æй ма дзæбæх кæнæнт, фæлæ дохтыры æххуыс бацагурæнт, – зæгъы «Роспотребнадзор»-ы эпидемиологион цæстдарды хайады сæргълæууæг Цæрикъаты Мæдинæ.
Рынчынты нымæц къаддæр кæд кæны, уæддæр управленийы кусджытæ адæмæн иудадзыгдæр сæ зæрдыл лæууын кæнынц, низты профилактикæйы мадзæлттæ æххæстгæнинаг кæй сты, уый.
Нæ уацхæссæг
